Kan hamna på bordet til prins Charles

Det var då den italienske Slow Food-presidenten Carlo Petrini var på besøk på Lyngheisenteret 1. mai i fjor, at han under middagen lova å senda ein smaksprøve av det han kalla «verdas beste lam» til sin gode ven prins Charles. No er Petrini full gang med å få til eit møte mellom villam frå Lygra og den kongelege sauebonden frå Wales.

Julegåve
Planen var å gje prinsen ein villsau i julegåve alt i fjor, men dette kokte vekk i kål då det viste det seg at prinsen skulle vera i Pakistan i perioden som var aktuell for overleveringa, seier Terje Inderhaug. Han arbeider med matkultur i fylkeskommunen og er ein del av gjengen bak villsaustuntet.
Får me til ein avtale med prinsen, er planen at Lindås-ordførar Tove Linnea Brandvik skal få overlevera gåva sidan den sauen/lammet som prinsen skal få er frå Lygra. Men bak prosjektet står eigentleg både Slow Food-rørsla, Villsaulaget, fylket og regionen, forklarer Inderhaug.

Nyttar sjansen
Sidan Prins Charles er ein av Wales sine største sauebønder og Slow Food-presidenten Carlo Petrini er ein god ven av prinsen, har Inderhaug stor tru på at dei skal få til ein avtale. Og får dei først sjansen, har dei tenkt å spela på alle strengene dei har.
? Me vil marknadsføra Hordaland for alt det er verdt. Difor har me blant anna tenkt å kombinera overrekkinga med tenning av julegrana i Cardiff. I tillegg vil me prøva å få finna ei rolle til elevane som er utplasserte på skulane i og omkring Cardiff gjennom samarbeidet med Knarvik vidaregåande skule. Me ser også føre oss eit samarbeid med sjømannskyrkja, seier Inderhaug.

Offerlam i kø
Er det bestemt kven av bøndene på Lygra som skal få æra av å ofra lammet sitt?
Nei, så langt er me ikkje komne enno. Men det som er klart er at lammemåltidet skal vera like godt som det Carlo Petrini fekk servert på Lygra. Det hadde kokt i sju timar, og var laga av Hanne Frosta som har vorte kåra til årets kokk og er medlem av Slow Food-rørsla til Petrini. Kven som skal koka lammet til prinsen, er uvisst, men mykje kan tyda på at elevar frå Fitjar vidaregåande skule skal ha ein finger med i spelet sidan dei har Restaurant- og matfaglinje, fortel Inderhaug.

Godkjend som Slow Food
Å få eit produkt sertifisert som Slow Food, har stor prestisje, og statusen som følgjer med kan avgjerda lønsemda til prosjektet. Etter Lygra-besøket i fjor vart også villsauen godkjend. Den vart godkjend som fjerde norske Presidium på matmessa Salone del Gusto i Torino etter Brimost frå Sogn og sølvsild, gullsild og hardrøykt sild frå Sunnmøre. Presidiet omfattar kring fire hundre produsentar som er medlemer av Norsk Villsaulag, og som samarbeider med Lyngheisenteret på Lygra.