Kan redda Miljøkortet

Så langt vil berre Frp og Høgre avvikla ordninga med Miljøkort. Det kan sikra fleirtal for ei vidareføring når fylkesutvalet avgjer saka 15. mai.
? Ordninga vert etter mi vurdering for dyr. Fylkeskommunen kan få att betre kollektivtilbod for dei pengane, meiner leiaren i fylket sitt samferdselsutval, Gustav Bahus (Frp).
Bahus brukte dobbeltrøysta si i samferdselsutvalet for å sikra fleirtal for fylkesrådmannen si tilråding om å avvikla støtta til Miljøkortet.
Kortet har vore ei prøverordning frå nyttår som gjeld ut mai.
Prisen har vore 630 kroner månaden for å reisa dagleg mellom Nordhordland og Bergen, ein rabatt på heile 40 prosent.
Bahus viser til at det er seld 93 Miljøkort meir enn det som var seld av månadskort. Han finn det vanskeleg å svara på kor mange fleire som burde kjøpt kortet for å sikra hans støtte vidare.
? Avrøystinga i samferdselsutvalet viser at det må jobbast aktivt fram til fylkesutvalet tek ei avgjerd, seier Grethe Lunde (KrF) frå Radøy.
Ho er blant dei som har gått i bresjen for kortet og vil prioritera vidare subsidiering.
I samferdselsutvalet gjekk Frp og Høgre sine seks inn for å avvikla Miljøkortet.
Dei seks frå KrF, Ap, RV og SV vil ha ei eller anna form for vidareføring. KrF sitt framlegg er å utvida ordninga til å gjelda alle innfartsårene til Bergen.
På møtet mangla Bente Bondhus (Sp), og ingen andre frå partiet kunne stilla som vara.
Ved førre val var det Høgre, Frp og KrF som fann saman i koalisjonen som gav Torill Selsvold Nyborg (KrF) som fylkesordførar.
Denne koalisjonen har også fleirtal med åtte av 15 i fylkesutvalet, men i denne saka kan Pål Kårbø (KrF) vippa avgjerda til fordel for Miljøkortet.
Det føreset at Ap, SV, Sp og Venstre ønskjer ei vidareføring eller utviding av ordninga.