Kan verta 7-Eleven

Hydro sel sin eigarandel i bensinstasjonkjeda Hydro Texaco til Reitan Servicehandel. Også eigaren av den andre halvparten, Chevron, sel til Reitan.

750 stasjonar
Dermed overtar familieeigde Reitan heile verksemda, som omfattar meir enn 750 stasjonar, 402 norske og 370 danske. Planen er at fleire av stasjonane skal få 7-Eleven-butikkar i løpet av dei neste åra. Hydro Texaco har stasjonar på Seim i Lindås, Hosteland i Masfjorden, Manger på Radøy og Mastrevik i Austrheim.

? Reitan flink
Hydro Texaco på Mastrevik i Austrheim er ein av dei stasjonane som no kjem under Reitan si styring. Ottar Inge Austrheim som eig og driv stasjonen ser positivt på overtakinga.
? Reitan er flink å driva butikk, så det kan verta ei positiv endring. Men me veit enno lite om kva som skal skje, seier Austrheim.
Han fortel at overtakinga først finn stad den andre oktober, og at han først då veit kva som skjer vidare. Han ser ikkje for seg altfor store endringar i drifta.

Går bra
? Det er jo mogleg at ein vil sjå nye skilt her ute, kanskje også 7-Eleven-skilt, seier han.
Stasjonen går bra i dag, og tilbyr alt mykje meir enn bensin. Austrheim er i tvil om det er marknad for ein 7-Eleven-butikk.
? Men eg må seia at eg er litt spent på kva overtakinga får å seia, seier Austrheim.