Kan verta berre ein ambulanse på vakt

- Slik eg har tolka seksjonsoverlege Guttorm Brattebø, kan det vera aktuelt å gjennomføra kuttet i Knarvik ved å ha ein ambulanse på vakt i visse periodar på kveld og natt, seier plasstillitsvald Bjørn Tore Hatletun ved ambulansetenesta i Nordhordland til Strilen.
Brattebø er seksjonsoverlege i akuttmedisin i Helse Bergen.
Ei slik innsparing er ein måte som ikkje vil berøra Legevakta, fordi ein då ikkje treng legen som andremann på ambulansen. Men likevel meiner Hatletun det er ei dårleg løysing.

Kan verta dyrt
I dag har dei tilsette i Knarvik kvilande vakt, som inneber at dei kan sova på jobb til det kjem ei utrykking. Medan dei søv, har dei berre betalt for kvar tredje time.
? Viss det berre skal vera ein ambulanse på vakt, trur eg det vert så mykje å gjera at ein må gå bort frå kvilande vakt, og då må ein ha ti tilsette pr. bil i staden for sju. Det vil verta dyrare for Helse Bergen enn den ordninga som er no, påpeikar Hatletun.

Svekka
Hatletun meiner og Helse Bergen snakkar med to tunger når dei på den eine sida vil overta ambulansetenesta i hele fylket for å gje eit betre tilbod, og på den andre sida kuttar ned.
Han seier dei tilsette ikkje utan vidare vil godta dei nedskjeringa som styret i Helse Bergen no har vedteke, og han er sikker på at tenesta vil verta dårlegare på denne måten.
? Trykket vil auka på dei som er igjen, seier han.

Styreleiar Ranveig Frøiland seier til Helse Bergen si heimeside at innsparingane var heit naudsynte, og ho rosar leiing og tilsette for det store arbeidet som er lagt ned for å kunna gje Helse Bergen eit budsjett i balanse.