Katastrofen er eit faktum

Det var eit trist syn som møtte dei mange om hadde teke turen til Fyrsundet då det lysna i morgontimane laurdag. Ein tjukk oljegraut flaut i fjøra og hadde grisa til svaberg og strender. Det lukta sterkt av olja, slik at det var vanskeleg å vera nede i fjøra lang tid om gongen.



La ut lense
Utanfor Fedje gjekk det ei rekke med båtar fram og tilbake, utan at det såg ut som at noko skjedde. Men nokre av dei som var involverte i oljeverndeponiet på Fedje før det vart nedlagt ,og folk frå brannvesenet, starta arbeidet med å leggja ut ei av dei fire olje lensene som framleis er lagra i konteinarar på øya. Målet var å stengja inne den olja som hadde kome inn i Fyrsundet, slik at den ikkje skulle forureina andre stader. Då Strilen var på staden litt før klokka eitt laurdag, hadde dei lagt klar den eine lensa, og venta på ein båt. Men fleire gav uttrykk for  at dei hadde lita tru på at dette kom til å monna særleg for å avgrensa  skadane frå olja. NRK  hadde vor ute i båt nord i kommunen, og meldte om mykje olje der. Dei meldte og om sjøfugl som var tilgrisa av olje eller som drukna i oljeflaka.



Dårleg ver
Vertilhøva i området er vanskelege. Vinden løya litt mot laurdag føremiddag, men tok seg seinare opp igjen. Mot kvelden og natta skal vinden auka på. Tor Christian Sletner frå Kystverket, uttala i media at det er vanskeleg å leggja ut lenser så lenge bølgjene er høgare enn tre meter. Han sa og at det er godt med oljevernutstyr i området, mellom anna i dei fire slepefartya og dei tre kystvaktskipa som skal liggja utanfor Fedje. Kystverket har også meir oljevernutstyr på veg. Sletner reknar med at oppryddinga vil ta eit halvt år, og vil krevja innsats frå mange menneske.
Slik vermeldingane ser ut no, kan det altså gå lenge før det eventuelt vert lagt ut lenser i særleg omfang.
Frampartiet på «Server» vart slept vekk frå området, og ligg no på ein seks meters grunne på CCB-basen på Ågotnes. Akterskipet, som også inneheld olje, ligg framleis delvis under vatn ved havaristaden (sjå biletet). Skipet vart brote i to delar der den største oljetanken med 290 kubikk tungolje låg. Kystverket meiner det er sannsynleg at denne olja har kome i sjøen.

Årsaka uklar
Årsaka til forliset var framleis uklar då dette vart skrive laurdag ettermiddag, men det vert antyda at skipet kan ha fått motorstopp eller motortrøbbel. Lensmann Einar Vatne uttala i NRK laurdag at ting kan tyda på at kapteinen har venta for lenge med å senda ut naudmelding.
Skipet gjekk på grunn ein time etter at statslos vart sett i land på Fedje, opplyser Kystverket. Losen fortel at seglasen frå Årdalstangen til Fedje gjekk som normalt. På grunn av tryggleiksmessige årsaker, i samband med dårleg ver, avtala kapteinen og losen at seglasen skulle gå på innsida av Fedje, og utsegling ut Fedjeosen, opplyser Kystverket.

Knakk i to
Då trafikksentralen på Fedje oppdaga at skipet ikkje segla som normalt, vart skipet umiddelbart kontakta og beden om å halda vestleg kurs, opplyser Kystverket. Trafikksentralen skal frå dette tidspunktet ha hatt kontinuerleg kontakt med skipet. Kapteinen stadfesta vestleg kurs, men trafikksentralen observerte at skipet held fram med å drifta i nordleg retning, mot Hellisøy. Då kontakta trafikksentralen taubåtar til området. Det vart gjeve melding om grunnstøyting klokka 18.25. Mannskapet vart seinare evakuert og skipet knakk i to rundt klokka 23 fredag kveld.