Kickboksingsmeister frå Masfjorden

? Det har vore hektisk, med mykje «mas» og telefonar heimanfrå, seier Sleire til Strilen søndag kveld. Han er då på veg til å sjekka inn på flyet tilbake til Bergen og har knapt med tid til å la seg intervjua.

Rett til semifinalen
Foreldra Kjell Joar og Karen M. Sleire skulle eigentleg ha vore med som heiagjeng til Oslo, men dei vart forhindra. Christian Sleire seier til Strilen at det var åtte påmelde, men berre fire kunne stilla, mellom anna på grunn av skadar.
? Dermed vart det rett i semifinalen, som eg vann, og vidare til finalen, som eg også vann, seier Sleire.
I går hadde Sleire betre tid, og fortel då at han konkurrerte i fullkontakt-klassen. Det er då snakk om boksing, berre at ein og har lov til å sparka i tillegg.
? Fører ikkje det til mykje skadar?
? Eg har vel øydelagd nasa ein fem-seks gonger. Ho vert breiare år for år, men elles går det greitt. Det er ein utruleg fin sport, der ein får trena heile kroppen, seier Sleire.

Uavgjort i proffkamp
Han har og gått ein proffkamp i England tidlegare. Då boksar ein utan hjelm, noko som er ulovleg i Noreg. Den kampen enda uavgjort. Men det er ikkje snakk om mykje pengar i denne sporten, fortel Sleire. Proffkampen tente han 4.000 kroner på, og NM-tittelen i helga gav 2.500 kroner. Sjølv ein VM-tittel gjev ikkje meir enn 20.000 kroner i premie.
Sleire tek dette difor framleis som ein hobby, og trenar vanlegvis rundt fire gongar i veka i tillegg til jobbane som billakkerar og vektar. Han har ikkje teke stilling til om han skal verta proff.
? Eg er framleis ung. Me får sjå om eit par år, seier han.

Frå Ytre-Haugsdal
Sleire vaks opp i Ytre Haugsdal i Masfjorden, men flytta første gongen frå bygda som 17-åring. Han kom i kontakt med kickboksingmiljøet i Bergen i 1998, men tok ein pause frå sporten på grunn av militæret, skulegang og fotball.
? Men eg likar best individuelle idrettar som dette. Eg var kanskje litt for ego på fotballbana, seier han.
Kickboksing tok han opp igjen i 2003, og det førte altså fram til ein NM-tittel no i helga.