Kine gler seg til kongelaget

? Eg gler meg veldig til finalen laurdag, seier Kine Gjerstad Eide til Strilen på telefon frå Målselv.
Viss ikkje noko heilt spesielt skjer, er Kine å finna på kongelaget, der skytinga går direkte på fjernsyn i NRK1.
Resultatet Kine oppnådde på dei 25 skota tysdag, er det beste nokon kvinneleg skyttar har oppnådd på Landskyttarstemnet. Viss Kine greier å halda nervane under kontroll, kan ho verta den første kvinna noko gong som vinn baneskytinga på Landsskyttarstemnet.

Nervøs anvising
? Eg var ikkje nervøs under skytinga tysdag, men nervane kom under anvisinga, fortel Kine.
Då får skyttarane sjå kor godt dei har skote.
Kine skyt i klasse 4, normalt dei nest beste skyttarane. Ho har skote like gode omgangar før, men aldri på Landsskyttarstemnet.
? No skal eg ut og sjå på skyttarane i klasse 5, sa Kine til Strilen i går føremiddag.
Det er denne skytinga som avgjer kven Kine skal skyta i lag med på kongelaget, og kor godt utgangspunkt ho har før finaleomgangen, der ein skyt ti skot.

Kjekt
Kine Gjerstad Eide er elev på toppidrettsgymnaset på Lillehammer, der ho har skyting som spesialgrein.
? Det har ført til at eg har fått trent ganske mykje, seier ho.
Å skyta direkte på fjernsyn med «halve Noreg» som publikum tykkjer ho vert berre kjekt, og ho trur ikkje ho vert så nervøs heller.
? Eg skal prøva å konsentrera meg om skytinga, seier ho.
Laurdag får me vita om Kine vert historisk. Viss ho ikkje skyt seg heilt bort, har ho i alle fall sjansen til å få ei topplassering.

I feltskytinga gjekk det dårleg.
? Eg trur eg må ha dunka borti noko, for siktet vart heilt skeivt, fortel ho.
Når det gjeld samlagsskytinga, måtte Kine vika plassen for ein annan lindåsing, Rune Seim. Han skal skyta på laget til Hordaland skyttarsamlag.