Kine vart nordisk meister

Kine Gjerstad Eide skaut seg til sølv i individuell baneskyting og gull med dei norske lagkameratane på både felt og bane under den nordiske meisterskapen som gjekk føre seg i Overhalla i Nord-Trøndelag i helga.
? Eg er veldig godt nøgd med plasseringa. Det var kjempekjekt å vera med, seier Kine Gjerstad Eide.

Høge krav
I år var første gang ho var gamal nok til å vera med på Nordisk ungdomsmeisterskap. Den unge jenta set høge krav til seg sjølv, og sjølv om ho tok andreplassen med 322 poeng, mot vinnaren Sigurd Sollie sine 325, var ho ikkje heilt nøgd.
? Eg skaut 231 poeng i innleiande rundar. Det er eg ikkje heilt nøgd med, for eg veit eg kan betre. Men det er ikkje alltid lett å skyta optimalt, seier Gjerstad Eide.

Ny erfaring
Under den nordiske meisterskapen lærte ho også ein del nytt.
? Det var andre folk, som hadde heilt andre vanar på standplass. Me er vane med å skyta raskt og eg følte eg nesten hadde god tid, men dei frå Sverige og Danmark vart veldig stressa. Dei skaut tre skot kjemperaskt, og så var det fram med skrujerna for å stilla på geværet innimellom. Då følte eg meg nesten litt rutinert, seier Gjerstad Eide.
Skytinga i eit nordisk meisterskap skil seg litt frå programmet på dei vanlege DFS-stemna. Mellom anna er skiva som vert nytta på 300 meter mindre enn vanleg, med ein tiar som er ti centimeter i diameter, og ikkje femten slik Gjerstad Eide er van med.
No håpar skyttarkronprinsessa å tilbringa haustferien på stemne i Tyskland.
På Nordisk meisterskap deltok også Rune Seim. Han fekk ein fin andreplass i feltskyting.