Kjempar for å få byggja i Skjelsundet

? Her kan eg verkeleg tenkja meg å byggja hus, seier Espen Angeltvedt (26) til Strilen.

Han er ein av åtte unge interessentar som har sagt frå om at dei ønskjer å byggja hus i det nye byggjefeltet i Skjelsundet, før planane er godkjende.

Alle åtte bur i Nordbygda no eller er oppvaksne der. Nokre er einslege, andre er sambuarar og ein har familie.

Angeltvedt jobbar på eit fiskeoppdrett i nærleiken.

? Eg er klart til å begynna å byggja så snart planane er godkjende, seier han.

Ikkje gje seg

I den nye kommuneplanen for Masfjorden er det lagt ut eit mindre byggjefelt i Skjelsundet, på fastlandet mellom Hosteland og Areklett. På ein skissert plan er det avsett elleve tomter. Men Fylkesmannen har sett foten ned, fordi byggjefeltet ligg i forbodsbeltet hundre meter frå sjøen. Men det har ikkje politikarane i Masfjorden tenkt å bøya seg for.

? Me vil kjempa for dette byggjefeltet. Her er det unge som vil busetja seg, og er det noko kommunen treng, så er det det, seier ordførar Håkon Matre til Strilen.

Ta det ut

Kommuneplanen kjem opp i kommunestyret torsdag, og før den tid håpar ordføraren å få til eit møte med Fylkesmannen, for å sjå om ein kan finna ei løysing som gjer at Fylkesmannen trekkjer si motsegn.

? Viss ikkje, tek me feltet ut av planen for å hindra at denne saka skal trekkja ut godkjenning av planen. Så tek me opp byggjefeltet som ei eiga sak, seier Matre.

Å leggja denne saka i skuffen er ikkje aktuelt, sjølv om enkelte av tomtene berre ligg 25-30 meter frå sjø.

Mindre naust

Når det gjeld dei andre motsegnene som har kome frå Fylkesmannen og fylkeskommunen, reknar Matre med at dei er ute av verda. Politikarane har bøygt seg litt når det gjeld nauststorleik og har gått ned frå 80 til 60 kvadratmeter som maksimumsstorleik. Fylkesmannen ville ha 45 kvadratmeter som øvre grense.

Den andre saka som har skapt problem, er retten til å byggja hus nummer to på gardane på utskild tomt. Her vil ein truleg leggja opp til ein praksis med dispensasjon frå kommuneplanen, men utan å krevja inn dispensasjonsgebyr. Dette gjeld også garasjar og andre mindre bygg.