Kjøper straum frå Sogn

Dei tre kommunane er med i eit innkjøpssamarbeid saman med Osterøy, Øygarden og Samnanger. Etter felles prisinnhenting i 2011 skal dei no få straumen sin frå fylket nordafor, eller i alle fall rekningane.

– Frå oktober 2011 bytta desse seks kommunane straum­leverandør frå Fjordkraft til Sognekraft. Inngått avtale med Sognekraft er på to år, og kan så forlengast to gonger, med eitt år kvar gong, seier Jens Dahl, drifts- og vedlikehaldsleiar i Meland.

Større volum
Ved å gå saman har desse kommunane kunna forhandla pris for eit større kraftvolum.

Sognekraft AS er eit energiselskap med hovudkontor i Vik i Sogn, som produserer og sel elektrisk kraft. For å sikra seg mot svingingar i straumprisen har kommunane avtala fast pris på ein del av forbruket. For Meland er såleis 50 prosent av straumen dei brukar prissikra, medan 50 prosent av forbruket så langt er til flytande pris.

– Den halvdelen som er prissikra i 2012, er sikra til 37,15 øre/kWh, seier Dahl.

Til samanlikning betalte ein privatkunde hjå Fjordkraft 39,46 øre/kWh i november 2011, med produktet «Strøm til innkjøpspris». Her kom det for privatkundar eit fast tillegg på 49 kroner månaden.
(Nettleiga kjem i tillegg til desse prisane over).

Store tal
Meland kommune brukte til saman i 2011 kring 6,5 GWh. Med eit slikt forbruk vert det store tal av øresvariasjonar på straumprisen. Held den flytande halvdelen seg lik den som er prissikra, vil eit tilsvarande straumforbruk i 2012 summera seg til 2,4 millionar kroner. Eller for å vera heilt nøyaktig 2.414.750 kroner. Og det er for forbruket åleine, nettleiga kjem i tillegg.

Radøy kjøper straum av SFE

Etter ei anbodsinnhenting administrert av Bergen Energi AS har Radøy kommune no straumavtale med Sogn og Fjordane Energi. Kommunen har eit kraftforbruk på om lag 4,7 GWh/år.

Ishavskraft til bådeFedje og Austrheim

Kommunane Austrheim og Fedje kjøper no straum av Ishavskraft AS, etter å ha sjekka prisar med hjelp av konsulentane i Bergen Energi AS. Austrheim kommune har eit kraftforbruk på om lag 2,4 GWh/år, Fedje på 1,4 GWh/år.