Kjører EM-runde i Austerrike

? I Ungarn var det til slutt ein clutchsylinder som vart sprengt, seier Ole Kristian Nøttveit.
Etter at teamet hans først hadde fiksa girkassen, var det så ein clutchsylinder som stoppa radværingen. Nøttveit rakk ikkje starten i den tredje innleiande runden, og vart til slutt ståande som nummer seksten.
? Det er slikt som kan skje, seier han, og legg til at bilen no er klar for runden i Austerrike.
Nøttveit reiste rett frå Ungarn til Greinbach, Austerrike, der han og dei andre nordmennene som deltek i EM har slått leir ved bana. Bilen Nøttveit kjører, ein Ford Focus T16 4x4, vert no klargjort etter alle kunstens reglar.
? Eg satsar på at eg skal klara ein B-finale. Men det vert tøft, det er 36 bilar påmeldt til start.
Nøttveit nådde B-finalen også i den første EM-runden, som gjekk i Portugal. I runde to vart det C-finale. Etter tre rundar er radværingen nummer tretten i samandraget, med i alt 11 poeng.
? Målet for sesongen er å koma mellom dei ti beste totalt, seier Nøttveit.

570 hestekrefter
Nøttveit kjøpte ein ferdig bil til EM-satsinga, denne vart kjørt av Tommy Rustad i fjor. Tilliks med dei andre bilane i Divisjon 1 er det turbo og firhjulstrekk, og Ford Focus-en leverer kring 570 hestekrefter.
? Det skortar ikkje på utstyret. Det eg må skaffa meg er rutine, dei andre har kjørt i ti-femten år og kjenner banene, seier Nøttveit.
Sjølv om han er tidleg på plass i Austerrike får ikkje Nøttveit prøvekjøra bana meir enn andre. Alle får kjøra oppvarming og tidstrening, og så må ein elles danna seg eit inntrykk ved å gå rundt på bana.
? Eg går litt rundt og prøver å gjera meg opp meiningar på kva spor eg skal velja, og korleis eg skal takla dei ulike delane av bana.
Girkassane vert gira om etter dei ulike banene, for å ha den rette utvekslinga og toppfarten. På enkelte baner kjem ein opp i over 200 kilometer i timen.

Satsar i tre år
Erfaring og rutine er viktig for å få gode resultat, og då må også ei EM-satsing vera langsiktig.
? Det vert mest sannsynleg ei satsing over tre år. Ein får ikkje vist kva ein kan det første året, seier Ole Kristian Nøttveit.
Arbeidsgjevaren AGR står i bresjen for radværingen si EM-deltaking.
? Det er AGR, saman med sine samarbeidspartnarar, som har gjort dette mogleg, seier han.
Med på EM-sirkuset er også to andre radværingar. Jan-Tore Ulvatn er med som mekanikar, og reiser frå løp til løp saman med Nøttveit. Også Joar Morken er med som mekanikar, Morken reiser frå Noreg til kvar EM-bane for å jobba i teamet.

Momarken heimebane
Det næraste Nøttveit kjem heimebane er runden på Momarken 7.-8. juli. Nokre busslaster med vestlendingar reiser nok over fjellet for å sjå EM-runden der.
? Det vert kjekt å kjøra på Momarken, seier Ole Kristian Nøttveit.
Radværingen har gjort det skarpt innan motorsporten her i landet før det denne sesongen er kjøring i EM. I 2005 tok Nøttveit NM-tittelen i rallycross, og året før vann han Vestlandsmesterskapet.