Klagar etter stortap mot Brann 2

? Begge gongene me har møtt Brann 2 denne sesongen, har dei stillt med toppa lag, slik at me har tapt klart. Me kan ikkje finna oss i at dei ein gong toppar laget og ei annan gong stiller med juniorlag. Det vert urettferdig, seier styreleiar Harald Bjørkelund i seniorgruppa i Radøy/Manger til Strilen.
Han viser til at Radøy/Manger i vår slo Frøya 7-1. Like etter slo Frøya Brann 2 2-0.

Eigen serie
Bjørkelund meiner det er feil at andrelaget til eliteserielaget Brann spelar i tredjedivisjon.
? Det er ikkje Brann 2 me vil til livs, men seriesystemet. Det beste ville vore at reservelaga i eliteserien hadde si eiga avdeling, eller at dei spela i 2.divisjon.
Dette vil han drøfta med fotballkrinsen.
Radøy/Manger spelar i 3.divisjon.

Sjansar begge vegar
Bjørkelund seier at kampen på Stadion ikkje berre var einvegskøyring, slik det står i BT.
? Det var sjansar til begge lag, og me hadde fleire som me burde skåra på, seier han.
Radøy/Manger tok elles leiinga ved Jarle Sylta etter seks minutt. Erik Huseklepp utlikna tolv minutt seinare. Han skåra heile tre mål i kampen, der det stod 3-1 ved pause.

Skal berga plassen
Sjølv om Radøy/Manger ligg heilt sist med berre fem poeng, fem poeng bak Frøya, er Bjørkelund sikker på at dei skal berga plassen.
? Det tvilar eg ikkje på i det heile, seier han.
Bjørkelund meiner skadar og kort øydela for laget i vårsesongen, i tillegg til at dei hadde ein del uflaks. No håpar han snart det er slutt på det.

Kanskje nye
Laget har ikkje fått nye spelarar i sommar, men Bjørkelund fortel at eit par kan vera på veg litt ut på hausten.
Elles har Geir Atle Osa signalisert at han vil møta på trening igjen og prøva å spela. Han har vore ute lenge med skade.
Neste kamp går fredag heime på Sletta mot Sandviken.