Klar for landsfinale

Eknes var den einaste av deltakarane frå Nordhordland som gjekk vidare til landsfinalen. Men konkurransen var tøff, då nær 400 ungdommar deltok i fylkesfinalen laurdag og søndag.

Vart til tilfeldig
Fotografiet Eknes gjekk vidare med er eit nærbilete han tok av eit lite gråtande barn i India i jula. Barnet har store triste auge, og under det eine er det ei klår tåre. Dette er eit foto som folk gjerne har i tankane lenge etter at ein har sett biletet. Eknes har fått svært god tilbakemelding på biletet på fotosider på internett. På nettstaden photosight låg bilete blant anna på 1. plass av alle portretta på nettstaden ei stund.  
? Biletet vart til litt tilfeldig. Eg hadde vore på ferie i India i eit par veker, og følte eg ikkje hadde fått teke så mange bilete. Eg gjorde difor ein innsats og tok blant anna mange bilete av folk som gjekk forbi, fortel Eknes.
Han stoppa opp ved dette barnet, men visste ikkje med ein gong at dette vart eit «blinkskudd».
Det oppdaga han ikkje før han tok det fram og skulle til å redigera bileta. No kunne han tenkt seg å finna ut meir om dette barnet. Det vert nok vanskeleg. Men han trur at det kan vera mogleg, då mora til ungen truleg er med i ein kristen kyrkjelyd i området der biletet vart teke. Eknes er 17 år og går på kjemi/prosess ved Knarvik vidaregåande skule. Men han ønskjer gjerne å arbeida med fotografi i framtida, dersom det er mogleg.  Den talentfulle 17-åringen er nesten aldri å sjå utan eit kamera over skuldera.
? Har du alltid med deg kamera?
? Nei. Men når eg ikkje har det med, hender det ofte at eg angrar på det, fortel han.
Dukkar det opp eit godt motiv, og han ikkje har kamera med, kjennest det ikkje heilt godt.
I slutten av mai går turen til landsfinalen i UKM i Trondheim, der han skal konkurrera med andre fotografar og unge kunstnarar.