Klart fleirtal for nye kommunegrenser

I fem av åtte kommunar i Nordhordland og Gulen er fleire positive enn negative til nye kom­munegrenser. Det viser svara i den store borgarundersøkinga som Sentio Research AS har utført for Regionrådet. Berre i Modalen, Fedje og Austrheim er det fleire som vil at kommunen deira skal halda fram som no.

Litt uventa er det kanskje at folk i Gulen er mest positive til kommunesamanslåing. Heile 70 prosent av dei spurde der er positive til at Gulen slår seg saman med andre. I Lindås er nesten like mange positive: 65 prosent.

Heilt mot
I den andre enden av skalaen finn me Modalen, der 85 prosent seier nei til at den vesle kommunen skal slå seg saman med andre. Nesten like negative er dei på Fedje. Der seier 83 prosent nei. Den tredje nei-kommunen er Austrheim, der 59 prosent er negative til å inngå i ein større kommune.

I Masfjorden og Meland er folk meir delte, men med eit fleirtal for kommunesamanslåing begge stader. I Meland er det elles svært stor skilnad mellom menn og kvinner.

Generelt
Det er viktig å ta med at folk berre har fått spørsmål om kommunesamanslåing generelt. Dei har ikkje svara på kva kommunar dei kan tenkja seg å slå seg saman med. Det vil sikkert verka inn på resultatet, og først når folk får konkrete alternativ på bordet, vil ein få vita kva folk eigentleg meiner.

Det skal no jobbast vidare med saka i kvar kommune, og fram mot neste val vil ein truleg vita meir om kva alternativ det er snakk om.

– Gledeleg å ha folk i ryggen

GULEN: – Resultatet av bor­gar­­undersøkinga er svært glede­leg lesning for oss. Den viser at me har folkemeininga i ryggen når me går inn for at Gulen må verta del av ein større kommune, seier Arve Mjømen (biletet) til Strilen.

Mjømen er ordførarkandidat for Gulen Høgre, som i mange år har gått inn for at Gulen må slå seg saman med andre kommunar. Mjømen meiner at viss ein skal få løysa dei kommunale oppgåve på ein god måte, må ein ha større einingar enn det Gulen er no.

– Ikkje minst gjeld det når samhandlingsreforma skal setjast ut i livet, seier han.

Til no har det mest vore snakka om ei samanslåing av Gulen, Masfjorden og Høyanger sørside, men Mjømen er ikkje framand for at Gulen kan gå inn i ein storkommune som omfattar heile Nordhordland.

– Det er enklare å få ting til i ein stor kommune, seier han.

– Eg må seia eg er overraska over at ein så stor del seier ja til kommunesamanslåing, seier ordførar Trude Brosvik (KrF).

Ho trur at dei som har svara ja, særleg har tenkt på ei samanslåing med Masfjorden.

– No skal saka utgreiast, og så  får me sjå kva som kjem ut av det. Saka vil truleg verta lagd ut i ei folkerøysing, seier Brosvik.