Knallresultat for Radøygruppen

? Me opplever eit veldig trykk for tida. Problemet er tilgangen på kvalifisert arbeidskraft. Me kunne tilsett ti personar på dagen viss dei rette folka dukka opp, seier dagleg leiar Lasse Ståløy i RadøyGruppen til Strilen.
Verksemda, som tek oppdrag frå olje- og skipsindustrien, opplever ein større ordretilgang enn nokon gong før.

Reparasjonar
? Me har oppdrag med ombygging av skip og leveransar til oljeriggar, i tillegg til produksjon av undervass pumpemodular, fortel Ståløy.
Nyleg har dei hatt eit større oppdrag med ombygging av ein båt.
? Det er høg oljepris og stor aktivitet i oljeindustrien som slår positivt ut for oss, seier Ståløy.

Fagfolk
Pågangen har vore så stor at til tider må verksemda leiga inn folk for å ta unna arbeidet. Men den store bøygen er mangel på fagfolk.
? Me manglar både platearbeidarar, sveisarar, skipsrøyrleggjarar, maskinarbeidarar og andre faggrupper, seier Ståløy.
Talet på fast tilsette er no 48, litt fleire enn i fjor. Men i tillegg kjem innleigd arbeidskraft. Denne kjem stort sett frå Aust-Europa, sidan det nesten er uråd å få tak i folk på den norske marknaden.

Utvida
I verksemda på Vetås har det vorte gjort store investeringar dei seinare åra. Ein ny hall for overflatebehandling er bygd, og det er investert ein god del i nye maskiner.
? Me har også fleire planar om utviding, men dei ønskjer eg ikkje å gå ut med før dei er nærare planlagt, seier han.
Ein er i desse dagar og i ferd med å flytta inn i ein ny kontorfløy på verksemda.

Auka overskot
Tal frå 2005 viser ein omsetnad på 57,8 millionar kroner, mot 38,3 millionar i 2004. Og alt no har ein passert fjoråret når det gjeld omsetnad i 2006.
? Og me har greidd å halda oppe driftsmarginane, seier Ståløy.
Driftsresultatet i 2005 vart 3,9 millionar kroner, mot 0,9 millionar i 2004.
Årsresultatet betra seg med over to millionar kroner til 2,3 millionar.
Det vart avsett 500.000 kroner til utbytte i 2005.