Knarvik best i landet

? Det er deilig! Skikkelig godt å få kåringa overstått. Me har jo trudd på dette i lengre tid, og endeleg fått det bekrefta, seier ei glad Ingunn Bjørge på telefon frå Oslo.
Ho er butikksjef ved Vinmonopolet i Knarvik, og må no til å planleggja italiatur for dei tilsette. På utdelinga i Oslo i går kveld deltok omlag 300 menneske, Linn Skåber var underhaldande prisutdelar, og damene frå polet i Knarvik var filmstjerner. I samband med konkurransen har det nemleg vorte laga ein filmsnutt frå arbeidsdagen deira, som vart vist fram onsdag kveld.
? Det var gøy med videoen, seier Bjørge.
Kva juryen sa om arbeidsplassen deira, fekk ikkje Bjørge heilt med seg.
? Me klarte ikkje å konsentrera oss, for me var så spente. Men det var einstemmig vedteke, og avgjerda vart teke fort, mot fire timars diskusjon i fjor, seier Bjørge.

Fotformsko og sylting
Det er mykje innsats og mange arbeidsdagar bak ei slik utmerking. Den viktigaste årsaka til at dei tilsette i Knarvik lukkast, er nok godt arbeidsmiljø. Når dei tilsette er nøgde, er det også lettare å yta god service til kundane.
? Kvar månad har me fokus på eit spesielt emne, og prøver å skapa noko rundt det, seier Line Elisabeth Seljelid, nestleiar ved Vinmonopolet i Knarvik.
Nett no er det alderskontroll som er spesielt vektlagd, og positive kommentarar får dei ofte.
? Folk står gjerne og flirar for seg sjølv når dei ser lappane i hyllene. Det likar me, seier Seljelid.
«Kor ofte syltar du bêr og frukt? Kva synest du om fotformsko? Og kva tenkjer du på når du et eit kamferdrops? » er blant spørsmåla som heng rundtom i butikken.
? Det er enkelt å driva alderskontroll når både me og kundane likar kampanjane, seier Seljelid.
På alderskontroll scorar dei 100 prosent i vurderinga frå region vest.

Årets butikk
Med blå skjorter, skjerf i halsen og smil om munnen sel kvinnene ved polet i Knarvik 42,3 liter i timen. Sjukefråværet er på berre 1,46 prosent. Og medarbeidarane er 100 prosent nøgde. Dei tilsette har lagt si flid i å gjera den beste jobben, og vart nyleg lønna med tittelen «Årets butikk» i region vest. No er dei «Årets butikk» i Noreg. Fredag er seks jublande tilsette tilbake på jobb i Knarvik, klare til å jobba fram mot siger også neste år.
? Det skal mykje til å vinna to år på rad, men me kan alltid verta betre, seier Bjørge.