Knarvik-elev skadd av softgun

? Eg lukka att auga, elles veit eg ikkje korleis det hadde gått, seier den skadde guten til Strilen. Han ber om at det ikkje vert nytta noko namn i avisa.
Eleven har sjølv softgun heime og seier at han ikkje brukar det til å skyta mot nokon, berre til å skyta på blink. Han oppfattar det som om aldersgrensa på den typen han har er 16 år. For kraftigare typar er det 18 års aldersgrense.
Guten seier at det er fleire som har kjøpt softgun i ein butikk i Knarvik.
Han har fått opplyst at politiet skal koma på skulen måndag og orientera om at elevar ikkje må ta med seg softgun.
? På skulen skal det ha vorte funne tre våpen. Det eine var gøymt i nokre busker, opplyser den skadde eleven.
Også faren gler seg over at det ikkje vart nokon alvorleg skade. Faren seier til Strilen at han tok guten med seg heim etter at han hadde vore på legevakten.
Skaden skal etter det Strilen får opplyst ha skjedd inne i eit klasserom.
Strilen fekk fredag ettermiddag stadfesta den triste episoden også frå to andre kjelder, men ingen ønskjer å stå fram med namn.
Ei kjelde henviser til at rektor ved skulen jobba med saka i tre timar. Det vart avklart kven som hadde brukt eit våpen til skade for ein annan elev.
Skulen legg opp til å arbeida vidare med saka på måndag, får Strilen opplyst. Innan deadline let det seg ikkje gjera å få tak i rektor Helge Brekke for ein kommentar.
Softgun er eit våpen som skal brukast til å skyta på blink og ikkje må rettast mot personar. Som ammunisjon vert nytta små plastkuler. Softgun har ei kraft nesten på linje med luftgevær, og frå hausten 2003 vart det innført 18 års aldersgrense for å bruka denne type våpen.
? Eg visste ikkje noko om at sonen min hadde softgun. Eg meiner det uansett må vera skulen som ryddar opp i dette, seier faren til Strilen.