Knarvik-elevar tok prisen

Prisvinnaren imponerte juryen med kreativ og nyskapande design, spennande produkt og positiv service på standen. Dei har utvikla heilt spesielle utepeisar, fakkelboksar og lysestakar. Vinnarane fekk 3.000 kroner  i premie frå Sparebanken Vest.

Årets Elevbedrift

Særleg eitt av produkta til elevbedrifta er eit godt døme på korleis ein arbeider med produktutvikling. Elevane har sett at faklar lagar stygge svimerke på mark og terrassar. Med fakkelboksane dei har laga unngår ein dette problemet, samstundes som det heile vert fint å sjå på. Dei har altså sett eit problem, og så laga eit produkt som løyser problemet.
? Me har jobba med prosjektet i eit par månader, seier Thor Brede Kvalvåg.
Han fortel at ideane har dei drøfta seg fram til sjølv. Materialane dei har brukt er ganske dyre, men fram til no har dei fått dette frå skulen. Berre til utepeisen, som er laga i eit slags spesialstål, har det gått med 1.000 kroner i materialar. Pengane dei no har vunne kan truleg hjelpa dei vidare i prosjektet. Dei som står bak bedrifta går i klasse 1MEb, og læraren deira er Jan Thorbjørnsen. Då Strilen var på standen fekk me opplyst at elevar ved Elektromekanisk og har hjelpt til.

Ideprisen

Ideprisen gjekk til elevbedrifta Smått og Flott ved Årås skule i Austrheim. Dei laga gelelys. Juryen meinte dei hadde laga flott design med enkle virkemiddel. Gelelysa hadde dei laga i vinglas. Utstillinga deira var også flott laga til, og produkta tiltrekte interesse. I tillegg til gelelys laga denne elevbedrifta skåler og koppar i offwhite med kinesiske teikn. Elevbedrifta vil selja produkta sine på Mastrevik torg og direkte til privatpersonar. Smått og Flott fekk ein sjekk på 1.500 kroner i premie frå Sparebanken Vest.

Produktprisen

Produktprisen gjekk til elevbedrifta Stubb og Stake frå Lindås ungdomsskule. Juryen fall særleg for nokre nissar som var laga av skråskorne trestubbar som dei hadde mala på. Med svært enkle virkemiddel hadde altså denne elevbedrifta funne fram til eit enkelt og sjarmerande produkt. Juryen trekte også fram at dei hadde brukt eit naturleg og miljøvenleg materiale.

Marknadsføringsprisen

Marknadsføringsprisen gjekk til elevbedrifta Kort til Jul frå Årås skule i Austrheim. Juryen var samstemt i at dette var den standen der ein fekk best personleg oppfølging. Dei ansvarlege for bedrifta var pågåande seljarar utan at det var ubehageleg. I tillegg hadde dei ein fin og effektiv stand og leverte ut ei spesiell heimelaga brosjyre og visittkort. Bedrifta laga heimelaga julekort, ulike serviett-motiv limt på glas, i tillegg til at dei selde lappar og saft.

Juryen var samansett av Lasse Ståløy i Radøygruppen, Marita Kleiveland frå Sparebanken Vest og Jon Halstein Tjore frå Strilen.

Nær 3000 menneske

Prisane vart udelte under Yrkes- og utdanningsmessa i Nordhordlandshallen.

Me reknar med at det til saman var nær 3000 menneske innom i løpet av onsdag og torsdag, og det er me godt nøgde med, seier Bjørn Kvalø. Han hadde det praktiske ansvaret for messa.

I følgje dei opplysningane han har fått, var besøket betre i år enn i fjor. Det er tredje gongen dei gjennomfører utdanningsmesse i Nordhordlandshallen. Kvalø seier og at dei fleste han snakka med under arrangementet vart positive. Målet med messa var blant anna å presentera næringslivet i regionen for elevar og foreldre, og å visa kva utdanningsmoglegheiter som finst i vårt nærområde.