Knuste minibuss med stein

? Eg synest dette er kjempetrist. No har eg ein stor klump i magen, seier Evy Renate Eliassen.

Minibussen som var ramponert, tilhøyrer nemleg fotballaget for psykisk utviklingshemma i NBK, der Eliassen sjølv spelar.

? Me fekk bussen i gåve for ei veke sidan. Planen var at me skulle kjøra til Sogndal på cup med han i januar. No ser det ut som det går i vasken, seier Eliassen skuffa.

Stein fast i døra

Hærverket skjedde natt til søndag, medan minibussen stod parkert på parkeringsplassen utanfor Nordhordlandshallen. Bussen ber tydelege spor av at det har vorte kasta store steinar med stor kraft rett mot han. Mellom anna stod ein av steinane fast i døra på høgre sida av kjøretøyet. I tillegg til alle siderutene, var også alle speglane og lyktene på minibussen knust. I løpet av natta har gjerningsmennene også kasta stein mot ei av rutene i Nordhordlandshallen.

Ikkje åtak mot PU

Sjølv om politiet granska staden søndag kveld, veit dei framleis ikkje kven som står bak hærverket. Dei trur det er tilfeldig at det var det kjøretøyet som vart ramponert, og har ingen mistankar om at det var noko som hadde til intensjon å ramma PU-laget til NBK.