Kommunalt avslag kan stoppa Campingplass

Avslaget på frådelinga vart gjort administrativt i Austrheim kommune 30. juni. Dersom Eriksen ikkje får frådelt dei 100 måla frå garden, får han problem med å få lån til prosjektet. Bankane er skeptiske til å gje lån til prosjektet dersom området framleis skal vera ein del av garden, fortel han.
? Eg oppfattar dette som at administrasjonen i kommunen i realiteten underkjenner godkjenninga av reguleringsplanen som politikarane har gjort, seier Eriksen.

Ikkje drivverdig
Det er no eit par år sidan kommunestyret godkjende reguleringsplanen for campingplassen, som kan gje plass til over 100 campingvogner og husvogner. Teknisk kontor grunngjev avslaget på frådeling med omsynet til resteigedomen og avkastninga som eigedomen kan gje. Dei er og redde for at eit ja til frådeling vil skapa presedens. Eriksen finn dette merkeleg.
? Gardsbruket har ikkje vore i drift sidan 60-talet, og er erkjent ikkje drivverdig frå dei lokale landbruksstyresmaktene. Bruket er på 550 mål, men det er berre om lag 25 mål som er dyrka mark. Ei frådeling av 100 mål som alt er regulert til campinglass, der under 5 mål er dyrka mark, vil ikkje spela nokon rolle for garden som eit drivverdig bruk, seier Eriksen.

? Er inhabil
Eriksen reagerer og på at frådelingssaka vart avgjort administrativt, og at ho er delegert til teknisk. Han meiner at teknisk sjef er inhabil i denne saka, då han og handsama reguleringsplanen for eit par år sidan. Det same gjeld andre sakshandsamarar som var involverte i reguleringsarbeidet. Eriksen viser til Kommunelova paragraf 40, 3b: «Kommunalt og fylkeskommunalt ansatte som i denne egenskap har medvirket ved tilretteleggelse av grunnlaget for en avgjørelse, eller ved tidligere avgjørelse i samme sak, skal alltid anses som innhabile når saken behandles i folkevagt organ. Ved behandling av årsbudsjett, økonomiplan, kommuneplan og fylkesplan gjelder ikke første punktum».

Krev klagenemnd
Truls Bauge (Kystpartiet) er skeptisk til både handsaminga av denne saka og til strukturen i kommunen.
? Eg har fleire gongar vist til denne lovparagrafen i Kommunelova. Denne viser at teknisk sjef er inhabil i denne saka, sidan han og var involvert i reguleringsarbeidet av området, hevdar Bauge.  Han meiner og det er svært uheldig at formannskapet både er plannemnd og klagenemnd. ? Difor har eg føreslege at det vert oppretta ei klagenemnd utanom formannskapet, slik at klagane vert sett på av nye folk. Men så langt har eg ikkje nådd fram med dette synet, seier Bauge. Ein klage frå Eriksen på avslaget om frådeling er det altså formannskapet som skal vurdera. Bauge meiner at ein ikkje kan avslå søknaden om frådeling, når det alt ligg føre ein godkjend reguleringsplan for campingplass på området.
På grunn av ferie fekk ikkje Strilen tak i nokon i administrasjonen i Austrheim som kunne kommentera saka.