Kongens gull til Marvid Dale

Marvid Dale (69) har bak seg ei omfattande karriere innan Frank Mohn-konsernet, og i dei seinare åra innan selskapa Mongstad Administrasjon AS, Mongstad Eiendom AS og Mongstad Vekst AS.
Som grunngjeving for at Marvid Dale no får Kongens fortenestemedalje i gull nemner Alsaker mellom anna arbeidet med å få plass forsyningsbasen på Mongstad, ein innsats som i 1986 gjorde Dale til æresmedlem i Nordhordland handverk- og Industrilag (NHIL).
Alsaker nemner også Dale sin medverknad til etableringa av TAF-modellen, utdanningsordninga kalla Tekniske Allmenne Fag.
? Den første klassen kom i gang hausten 1992. I dag er det i alt 19 skular som brukar denne utdanningsmodellen. Dette har også skapt nærleik og samarbeid mellom skulane og det lokale næringslivet, og sikra rekruttering til industrien, skriv Alsaker.
Med som grunngjeving er sjølvsagt også Dale si karriere innan Frank Mohn-konsernet, der han byrja i 1955 som assistent på verkstadkontoret. Seinare jobba han seg oppover, og Dale har mellom anna vore fabrikksjef ved anlegget på Flatøy (1978-1984) og seinare administrerande direktør same stad (1988-1992).
? Eit kjenneteikn ved deg er at du har vore ein pådrivar og inspirator når det gjeld innføring av ny produksjonsteknikk og teknologiutvikling, heiter det i fylkesmann Alsaker sin tale.