Kongepokal og ny NM-tittel

Kongepokalen fekk bordtennisspelaren for å vera beste mannlege funksjonshemma idrettsutøvar i Noreg.
Det er fjerde gongen han får denne utmerkinga. Urhaug var også favoritt til NM-tittelen for sitjande utøvarar i Modum i helga, og vann også denne tittelen.
25-åringen nærmar seg no totalt 20 NM-titlar, medrekna både singel og double-konkurransar.
Å få kongepokalen er likevel noko stort, sjølv om han har fått denne tre gongar før.
?  Ein konkurrerer jo med dyktige funksjonshemma idrettsutøvarar i alle idrettsgreiner, seier Urhaug.
Det er mogleg at han er den einaste utøvaren som har fått denne pokalen heile fire gonger.
Det store målet er OL i Bejing om to år. Urhaug har ei rekke gull i internasjonale konkurransar, men OL-medaljar har han ikkje frå før. Han seier at han i alle fall skal satsa på bordtennisen fram til OL, og så får han sjå. Det går med svært mykje tid både til trening og reising med satsing på dette nivået.
No startar og dei internasjonale stemnene, med VM i Sveits som årets høgdepunkt. Det skjer i september, og då skal Urhaug forsvara gullet frå i fjor.
Torsdag reiser bordtennisspelaren til Irland, for å delta på ein konkurranse der neste helg. Han reiser derifrå direkte til England, der han skal trena saman med det engelske landslaget, før det vert ein ny konkurranse helga etter.
? Det er veldig artig å ha fått denne moglegheiten til å reisa og oppleva så mykje, seier Urhaug.
Han spelar for Stord Bortennisklubb, men trenar mykje både i Bergen og heime på Manger. Der har han gode treningstilhøve på Radøy Ungdomsskule.
? Eg er svært takksam overfor Radøy Ungdomsskule at eg kan trena der, seier han.
Bordtennisspelaren får difor ofte besøk av utøvarar frå Bergen som kjem ut til Radøy for å trena. Urhaug har og fått ein ny treningsrobot, som er den mest avanserte som finst. Det gjer eigentreninga på Manger endå meir effektiv.