Kongesølv til Strilen-grunnleggjaren

Rundt 50 personar deltok under overrekkinga av fortenestemedaljen til Hannisdal laurdag.
? Eg har alltid vore fråhaldsmann, og har aldri vore full. Men i dag er eg faktisk full ? full av takksemd til dei som står bak dette, og til denne store forsamlinga her i dag. Eg er og full av takksemd til kona mi Lillian. Hadde det ikkje vore for henne hadde eg ikkje stått her i dag. Eg vil og takka borna mine, ikkje berre fordi dei sprang ærend og hjelpte til, men og fordi dei var rolege når eg trong ro, sa Hannisdal etter prisoverrekkinga.
Han sa og at det arbeidet han har lagt bak seg, hadde han aldri klart åleine. Han takka difor alle dei mange medspelarane som har vore med opp gjennom åra.

Utsending frå Kongen
Det var Lindås-ordførar Tove Linnea Brandvik som overrekte medaljen til Hannisdal.
? I dag er eg ikkje berre utsending frå Lindås kommune ? eg er utsending frå Kongen. Denne medaljen får du ikkje berre for din innsats for lokalsamfunnet, men for din innsats for nasjonen, sa Brandvik.
Ho trekte fram Hannisdal si mangeårige teneste som lærar og rektor i Lindås, og i arbeidet med å hjelpa dei unge til å verta sjølvstendige, tenkjande menneske.
? Då er det kanskje ikkje så merkeleg at du drog i gang lokalpressa, for ein del av arbeidet til media er nettopp å stilla kritiske spørsmål til vedtekne sanningar, sa Brandvik.

«Stril» eit heidersnamn
Hannisdal var blant dei sju personane frå skulemiljøet på Lindås som skipa avisa Strilen i 1961, og han tok over som redaktør frå og med utgåve nummer 16. Redaktørjobben hadde han fram til 1977, samstundes som han var tilsett i skuleverket. Då hadde opplaget auka til 4.500. Det tok mange år etter skipinga før det vart betalt honorar til redaktør og skribentar, og Strilen-kontoret var heime i huset hjå redaktøren heilt fram til 1975. Ordet «stril» var framleis eit skjellsord tidleg på 60-talet, og det var og ein del debatt i avisa rundt det namnet. «Me ville vera strilar og bladet skulle heita «Strilen», slik at stril kunne verta eit heidersnamn», var den klare meldinga frå Hannisdal og dei andre skiparane.

Fleire organisasjonar
Det var Trygve Aarre, Rune Brundtland og Stanley Hauge som var initiativtakarar til at Hannisdal skulle få medaljen. I grunngjevinga viser dei til Hannisdal sin store innsats i skuleverket, arbeidet med å skipa og driva avisa Strilen, styre- og leiarverv i ei rekke organisasjonar og politiske verv i kommune og fylkeskommune. Han har og markert seg som forfattar av fleire romanar og lokalhistoriske skrift.
Hannisdal har vore aktiv i organisasjonslivet. Han gjorde ein stor jobb for Lindås og Nordhordland indremisjon, for Motorførernes Avholdsforbund, Lindås fråhaldslag og Lindås mållag. I tillegg var han i mange år kommune- og fylkespolitikar for KrF.

Sveisa bygder saman
? Dersom nokon har fortent denne medaljen, er det deg, sa Trygve Aarre i sin tale under overrekkinga laurdag.
? Olav hadde fleire tankar med avisa. Det eine var opplysningstanken. Det andre var kulturaspektet, med blant anna å fremja strilekultur og dialekten. Men han hadde og ein politisk tanke - å styrkja regionen Nordhordland, sa Aarre.
Då Strilen vart skipa var Nordhordland i ei brytningstid, med nedgang i folketalet. Det var også mykje debatt om kommunesamanslåing. Hannisdal såg det som ei oppgåve for avisa å sveisa bygdene i regionen nærare saman. Då går det og lettare å løysa felles oppgåver, meinte han.

Tid til borna
To av borna til Hannisdal, Lars Magnus og Kjerstin, fortalde om travle foreldre, men som likevel hadde mykje tid til borna sine. Dei fortalde blant anna og om springing til bussen med filmar og avis som skulle til trykking, og om spennande menneske som kom innom og hadde noko på hjarta i samband med avisa.
Ivar Kårdal fortalde om samarbeidet i Motorførernes Avholdforbund. Det var blant anna ein stor markering då dei som første gjestar ved nybygde Vestland Hotell, fekk lov til å heisa MA-flagget til topps ved hotellet.