Krev 300.000 frå Austrheim kommune

Saka har vore mykje oppe i media og omhandlar ein grensetvist mellom Gina Austrheim og Hugo Stellberg ved Austrheim kai. Ein av dei grove sakshandsamingsfeila som kommunen gjorde, var at dei gjennomførte kartforretning på grensa mellom dei to naboane, utan at Gina Austrheim verken vart varsla eller kalla inn. Ho oppdaga først fleire år seinare at grensa hadde vorte flytta, då naboen etablerte ei brygge. Miljøverndepartementet har seinare oppheva kartforretninga, grunna ei rekke sakshandsamingsfeil frå kommunen si side.

Store kostnader
Saka har vore oppe i rettssystemet tidlegare, og er ei langvarig sak. Advokat Ivar Winjum skriv i eit brev at kommunen burde ha teke steg for å få kartforretninga annullert då dei første gong såg kva feil som hadde vorte gjort. I staden viste dei Gina Austrheim til jordskifteretten. Dette har medført ein lang og kostbar rettstvist for jordskifterett, lagmannsrett og Høgsterett sitt kjæremålsutval, der konklusjonen vart at jordskifteverket ikkje var kompetente til å handsama grensespørsmålet, skriv advokaten.

Vurderer saksøking
«Gina Austrheim kjenner seg umyndiggjort av kommunen. Hun er dertil påført betydelige utgifter og ubehageligheter over mange år som følge av kommunens uriktige handlingar og unnlatelser. Hun finner det rimelig at kommunen tilkjenner henne en erstatning for dette, og anser kr 300.000 som et passende beløp», heiter det i brevet frå advokaten.
Han opplyser elles at det alt er teke ut forliksklage mot Hugo Stellberg, for å få dom i grenstilhøvet. Dersom Austrheim kommune ikkje er villige til å inngå ein frivillig løysing på erstatningsspørsmålet, vil det vera aktuelt med søksmål også mot kommune, skriv advokat Winjum.
Kommunen har vedgått å ha gjort feil i denne saka, men viste og til at det vart lagt fram eit skriv om «semje om grense», som og Gina Austrheim hadde skrive under på.