Krev Gulenruta til Bergen att

? Viss dei vil at det skal bu folk i bygdene i Gulen, må dei ikkje gjera det endå vanskelegare å bu der for dei som ikkje køyrer bil, seier Sigrun I. Legård Randal (64) til Strilen.
Sjølv bur ho i Fivelsdal, ei av bygdene der det snart ikkje er fastbuande igjen. Etter at Gulenruta, Sogn Billag si bussrute, berre går til Sløvåg, har reisa til Bergen vorte langt meir tungvinn enn før.
Randal lir av sjukdomen Kols og må til Haukeland univeristetssjukehus i Bergen for behandlingar. Men det har vorte langt vanskelagre enn då Gulentuta gjekk heilt til Bergen.
? Før kunne eg vera i Bergen om lag halvti på føremiddagen, og då rakk eg akkurat behaldingane på sjukehuset. No går ikkje det, for no er eg i Bergen nesten ei time seinare, seier ho.
No må passasjerane gå av bussen i Sløvåg, ta ferja til Leirvåg og gå på HSD-buss der. Og denne bussen går om Mastrevik Torg før han køyrer til Bergen.

Mange eldre
Det er mange eldre folk som tek bussen, og for dei som er skrale til beins eller har andre plager, kan det vera tungt å ta seg ned i salongen på ferja under overfarten.
? Det var mykje greiare då me kunne sitja i bussen, seier Randal.
Viss ho no skal koma seg til Bergen på behandling, må ho ta drosje frå Fivelsdal til Sløvåg om morgonen for å nå første bussen i Leirvåg, og det same tilbake om ettermiddagen.
? Sidan eg har frikort, er det Trygdekontoret som må ta kostnaden, fortel ho.
Hadde Gulentura gått som før, ville kostnaden for det offentlege vorte langt mindre.
? Politikarane la ned ruta for å spara nokre kroner, men det kan fort gå ut att andre stader.

Skriv brev
Sjølv om vedtaket om å stoppa Gulenruta i Sløvåg er sett ut i livet, har ikkje Randal tenkt å gje seg.
? Eg har skrive brev både til samferdselsminister Liv Signe Navarsete og Liv Henjum i samferdselsutvalet i fylket, men eg får ikkje svar, så eg skriv igjen, seier ho og viser fram eit ferdigskrive brev.
Viss poltikarane først skulle kutta i rutetilbodet, meiner ho der er andre ruter som ville merkast mindre av dei reisande enn det som no har skjedd.
 ? Der går til dømes ei søndagsrute som ingen reiser med, seier ho.
Sigrun I. Legård Randal tykkjer det er rart at til og med politikarar frå Senterpartiet, som seier dei er for levande bygder, går inn for kutt som rammar folk i distrikta.
? Men dei har sjansen til å gjera om vedtaket, seier ho.
Viss tilbodet skal verta som no, trur ho ikkje ho kan verta buande i Fivelsdal mykje lengre.