Krev naust fjerna frå plan

Reknes Byggjevarer L/L har laga ein privat reguleringsplan for Duesundøya som omfattar både bustadhus, leilegheiter og hytter. Interessa for å byggja er stor, men planane har så langt vorte stoppa av at Fylkesmannen i Hordaland i sommar la ned motsegn mot planen fordi ein meinte han førte til for store inngrep i naturen.

Ei motsegn fører til at godkjenningsprosessen trekkjer ut i tid og vert langt meir omstendeleg enn han elles vil vera.

 

Ta bort naust

Etter to synfaringar på øya i sommar og haust har no Fylkesmannen sagt seg villig til å trekkja tilbake motsegna. Men vilkåret er at to naustområde som er plasserte nord på øya, vert tekne ut av planen. Grunnen er at dette området til no er heilt urørt. Dessutan meiner Fylkesmannen at nausta vert liggjande for langt frå husa og hyttene.

 

For synleg veg

Fylkesmannen ber også om ein del andre, mindre endringar i planen. Ein veg inn i området vert for synleg i terrenget, meiner han. Den bør flyttast. Han meiner og at ein bør vurdera å ta eitt av bustadfelta ut av planen i denne omgang.

? Me håpar no at det ikkje skal få gå så langt tid før planen er godkjend, slik at utbygginga kan starta, seier ordførar Håkon Matre til Strilen.

Politikarane er ivrige etter at dette populære utbyggingsområdet kan verta teke i bruk.

 

Går vidare

? Dei innvendingane du referer der, kan me leva med, sjølv om me vil argumentera mot, seier dagleg leiar Egil Sagstad i Reknes Byggjevarer til Strilen.

Han hadde ikkje fått lese brevet frå Fylkesmannen då Strilen tok kontakt før helga.

Men der må også utførast arkeologiske undersøkingar i området, og meir prosjektering må til, så utbygging vert det i alle fall ikkje før utpå nyåret. Sagstad fortel at der er folk på liste både for å kjøpa hus, leilegheiter og hytter i prosjektet