Kronisk valdsmann slepp fengsel

Rett før jul i fjor slo han til ein annan mann i ansiktet utanfor utestaden Garveriet i Isdalstø. Mannen fall i bakken og vart slått bevisstlaus. Ifølgje retten kom slaget heilt uprovosert.
I mars i år tok han seg inn i ein bil og slo ein mann fleire gonger i hovudet og/eller på overkroppen.
Helga etter drog han heim til denne mannen. Då han ikkje fann nokon heime i hytta, knuste han ei rute og stal mellom anna ein dvd-spelar og ein forsterkar.
Ei natt i april tok han kvelartak på ein vakt ved Shell-stasjonen i Knarvik. Han skal og ha kasta snøball mot mannen.
I tillegg til dette var ungdommen tiltalt for å ha slengt grove ukvemsord etter lokale politibetjentar under ein fest på samfunnshuset i Austrheim. Han var og tiltalt for å ha drukke øl offentleg utanfor denne festen.
No er mannen dømt på alle punkt i Nordhordland Tingrett. Resultat: 150 timars samfunnsstraff. Og straffa var slått saman med ei tidlegare straff på 125 timar.
Gjennomføringa av den tidlegare samfunnsstraffa vart avbroten etter ein time på grunn av dei nye valdsepisodane. Ergo slepp ungdommen i realiteten med å sona 26 timars samfunnsstraff for å ha banka opp fleire personar.
Mellom forholda ungdommen tildlegare er dømt for, er å ha lagt ein ungdom i bakken og sparka han fleire gonger ved to ulike høve same kveld. For dette vart han dømt for vald med farleg reiskap under særs skjerpande omstende, ei handling som ifølgje retten hadde preg av mishandling. Han er og dømt for fleire andre tilfelle av vald.
Retten peikar i den førebels siste dommen på at låg alder ikkje vert tatt så mykje omsyn til når det er tale om uprovosert valdsbruk frå medlemmer av gjengar. Retten peikar og på at ungdommen klart har eit problem med alkohol og sinnemeistring, og meiner han har «kort lunte», eventuelt ikkje noko lunte i det heile.
Vanleg rettspraksis tilseier fengsel utan vilkår. Men Nordhordland tingrett valde heller samfunnsstraff. Som grunn vert gjeve at han bør få ein siste sjanse, og at han skal inn i eit livsmeistringsprogram som kan læra han sosial omgang, sinnemeistring og konfliktløysing.