Kult med refleks

Elefantar, hjerte, hender og fiskar pyntar bordet på møterommet til Ungdomsrådet i Meland. Over tusen forskjellige refleksbrikker er samla inn for å gjera livet langs vegen tryggare. I løpet av dei nærmaste dagane skal refleksfigurane få nye eigarar. Alle dei 997 elevane på barne og ungdomsskulane i kommunen skal få kvar sin refleks.

Færre ulukker
? Mange ungdomar tenkjer at det ikkje er tøft eller kult å bruka refleks. Det er heilt feil. Refleks reddar liv!
Oppfordringa frå Annette Carlsen er klar. Leiaren i Meland Ungdomsråd ønskjer at ungdomane i kommunen skal verta flinkare til å bruka refleks.
Ungdomsrådet har i alt tretten medlemmar. Fleire av desse kan fortelja om farlege situasjonar i kvardagen. Dårleg ver og mørke kan gjera skulevegen utrygg. Difor ønskjer ungdommane og setja fokus på trafikktryggleik. Ungdomane ønskjer å gå føre som eit godt eksempel.
? Me skal verta endå flinkare å bruka refleks, seier dei.

Mykje støtte
Tidleg i haust fekk ungdommane ideen om at dei kunne dela ut refleks til alle skuleelevane i kommunen. Tanken er at dersom alle har refleks, så vert det også lettare å bruka den. Ungdommane har tatt kontakt med fleire aktørar for å spørja om dei var villige til å stilla med refleksar. Dei vart godt mottatt og resultatet vart over tusen eksemplar. Refleksane kjem frå Lindås og Meland Lensmannskontor, NAF Nordhordland, Trygg trafikk, Sparebanken Vest og IF skadeforsikring.