Kulturpris for å redda dampen

Ordførar Tove Brandvik viste i grunngjevinga til at det er lagt ned over 30.000 dugnadstimar for å setja Oster i stand.

Nordhordland Veteranbåtlag hadde mykje strev og fleire feilslag før laget kom over MS Vaka, fraktefartøyet som viste seg å vera gamle Oster i framand form og anna teneste.

Framdrifta og pågangsmotet bak 10 års arbeid med restaureringa har avtvinga respekt. Laget har oppnådd tillit hjå dei mange som har teikna seg for store og små gåver til restaureringsarbeidet, heiter det i grunngjevinga for prisen.

Det vert og vist til at Oster i framtida vert viktig for forståinga av den regionale historia. Veteranbåtlaget greip det som truleg var den siste sjansen til å ta vare på denne delen av vår lokale fortid.

Veteranbåtlaget har no 700 enkeltmedlemer og bortimot 40 medlemsbedrifter.

Vidar Lehmann og Karsten Stene tok imot prisen. Begge sa seg svært takksame for tildelinga. Som synleg bevis hadde dei motteke eit flott tinnfat og sjekk på 5000 kroner.

Lehmann nytta også sjansen til å rosa kommunen for den interesse og dei midlar kommunen har bidrege med til Oster. Som innleiing til prisutdelinga var det naturleg nok berre ein song som passa å syngja. Som del av si takk framførte også Lehmann eit av ekstraversa som er laga i ettertid. Men dei har naturleg nok ingen offisiell status i «Dar kjem dampen».

Frå kommunen vert det elles vist til at laget neppe får tid til å kvila på laurbæra. No skal Oster drivast.