Kunst i sentrum

– Eg fekk kamera til jul for eit par år sidan, og sidan har eg foto­grafert.

Eg har blant anna gått på kurs og lært meg å ikkje bruka autofunksjonane, fortel Hanne Napsøy.

Ho var ei av dei som kom vidare, som relaitivt fersk foto­graf.

Mønstringa i Gulen vart i stor grad prega av maleri og fotografi – utstillinga var svært imponerande, og dommarane må ha hatt ei stor utfordring med å velja ut dei heldige.

Dei utvalte vart Maria Eide og Hanne Napsøy med foto­grafi, Jardar Tveit med maleri – han vann og kunstnarstipend, Linnea Oppedal på piano, og Karoline Johansen og Marita Børnes, på vokal og piano.

Hard jobbing
Linnea Oppedal gjekk vidare denne gongen, etter at ho i 2010 vann kunstnarstipendet for pianospelinga si.

Den siste tida har ho jobba hardt for å koma vidare.

– Vanlegvis er det litt på og av, men denne veka har eg øvd kvar dag, fortel pianisten, som har spart stipendet sitt og plan­legg å bruka det på nettopp eit piano når ho byrjar på vidaregåande.

Stor variasjon
Rebecka Randal, leiaren i ungdomsrådet i Gulen, var godt nøgd med alle som opptrådde og viste fram kunsten sin laurdag. 

Ho har sjølv vore med to gonger, og veit altså kva ho snakkar om.

– Det var mange ulike framføringar i dag – det var svært spreidd, men alle var veldig flinke.

Marita og Karoline vann ipod i tillegg til å gå vidare, medan Jardar Tveit altså gjekk vidare i tillegg til å motta kunstnarstipendet på 3000 kroner for kunsten sin.