Kva med all jorda?

Området skal ikkje verta campingplass eller bustadområde. Jorda er deportert frå Åsane og skal bli slåttemark i framtida. I alt skal heile 25 000 kubikk jord flyttast frå Åsane til Flatøy i tida framover. Jorda kjem frå eit område i nærleiken av Vestlandshallen, og vert flytta for å gjera plass til å bygga to fotballbaner.
­? At dei vil dumpa jorda akkurat på Flatøy har vel med at det kanskje er den næraste plassen. Det er ikkje så mange stader som tar imot så store masser lengre, seier Johan Albert Sudmann.
Gardbrukaren eig området der all jorda vert tippa. Tidlegare har han tatt imot jord frå utbygginga av både Knarvik Senter, Frank Mohn og Nordhordlandshallen. Jordmassane har no blitt til 30 mål dyrka mark, og med dei nye massane utvidar Sudmann enda meir.
? Området var eit skarva beite før. No håpar eg å få laga ei jamnare slåttemark av det, seier han.

Mykje arbeid
Før jordmassene vert slåttemark, må det planerast og dyrkast.
? No er det berre sørpe. Det er ikkje mogleg å gå uti eingong. Me har bygd demningar så ikkje massane skal fara på sjøen, seier han.
Det er ein del arbeid som føl med eit slikt prosjekt. Rivenes transport står bak transporteringa av jorda, men Sudmann må sjølv syta for tilrettelegging og planering.
? Eg håpar jo at den summen eg får for å ta imot massane vil dekka dei kostnadane eg har hatt, og kjem til å få i samband med dette, seier Sudmann.
Til no har han nytta 100 000 på å legga ein bekk i rør, og fleire utgifter vert det med planering og istandsetjing. No er Sudmann ute kvar kveld for å setja i stand vegen.
? Den vert ganske dårleg og sølete med så mykje tung trafikk, seier han.
Det har alt vore køyrd jord til Flatøy i fire-fem veker, og tippinga av jord vil halda fram til ut i februar ein gong.