Kvesser knivane mot luftspenn

Det er det blåe alternativet på BKK sitt kart over Radøy som vil råka Gjerde og fleire andre gardbrukarar på Straume.

? Dei seier at det er det minste aktuelle alternativet, har Gjerde notert seg. Så naturleg nok håpar han at det vil slå til.

? Nedgraving kan vera greitt, men kanskje ikkje alltid over innmark. Det kan skapa problem for kanalar og grøfting som alt er der, seier Gjerde.

Torsdag ettermiddag viser han og Werner Birkeland Strilen kor ei kraftline kan koma etter BKK sine alternativ.

Før det har Birkeland, som er grunneigar på Soltveit, studert kartet Strilen har med.

Kan råka Straume

? For min del ser det greitt ut etter dei alternativa som er teikna inn. Eit alternativ går på sørsida av meg og dei andre nordom, seier Birkeland. Han ser av kartet at det sørlege alternativet vil gå ein god del gjennom utmark.

Sjølv om grensene mellom grunneigarane ikkje går fram av kartet, finn Birkeland nokså fort ut kva alternativ som kan råka innmark.

? På Staume kan eitt av alternativa gå over innmarka til fleire grunneigarar, blant anna Audun Gjerde, seier Birkeland.

Gjerde, som er utdanna tømrar, vert sport opp medan han er i ferd med å avslutta arbeidsdagen på tidlegare Nordanger handelslag. Bygget er i ferd med å verta ombygd til fire leilegheiter.

Og Gjerde har sett kartet me har med oss, på trykk i Strilen. Det blå alternativet kan gå over både han og kanskje tre andre gardbrukarar på Straume.

- Vert skjemmande

Både Gjerde og Birkeland trur motstanden kan verta heftig dersom BKK vil køyra gjennom planane om luftspenn.

? Terrenget er lågt på den nordlege delen av Radøy. Eit stort luftspenn vil verta skjemmande i terrenget, seier Werner Birkeland.

Han viser til at frå austsida på øya, over Nordanger og mot Bø også er eit flott utmarskområde.

? Eg går sjølv ein god del på tur i dette området, seier Birkeland.

Hemmar utnytting

Birkeland legg heller ikkje skjul på at han har notert seg faren for helseskadar for dei som bur nær kraftlinjer.

? Eg har sjølv vener i regionen som bur nær ei kraftlinje. Dersom dei hadde visst det dei veit no, ville dei aldri busett seg der, seier Birkjeland.

Både han og grunneigar Audun Gjerde viser og til at eit luftspenn kan koma til å kryssa areal aust på Radøy som ligg fint til mot sjøen.

Begge viser til at landbruket kan ha ei usikker framtid.

Difor kan utmarksareal kanskje verta frigjort til hyttebygging sjølv om dette er vanskeleg å få til i dag.

Men luftspenn eignar seg ikkje særleg godt for å få til hyttefelt, antydar dei to.

Råd til politikarane

? Eg trur ikkje grunneigarane vil gå mot nedgraving av ei kraftline. Ved eit luftspenn ville i alle høve eg ha ytt nokså heftig motstand, seier Werner Birkeland.

Hans råd til politikarane i Radøy er klinkande klart:

? Dei må pressa BKK til å leggja ei høgspentlinje i kabel.

Og det er eit råd i alle høve ordførar Olav Steinar Namtvedt (Sp) vil lytta til.

? Me vil nok be om nedgraving av linja, seier Namtvedt i ein kort kommentar til Strilen under kommunestyret sitt budsjettmøte. Han viser til at den kortaste traseen berre vil gå 13 kilometer over land på Radøy.

? Då skjønar eg ikkje korleis BKK kan rekna seg fram til at det vil kosta 300 millionar kroner ekstra, seier Namtvedt. Han ser fram til å få nærare informasjon frå BKK på informasjonsmøtet som skal vera på Sletta onsdag, på Samfunnshuset Skogen.

I annonsa laurdag år det fram at møtet er flytta fram ein time i høve til første kunngjeringa.

På torsdag kveld er det møte i Haugatun på Lindås, for kommunane Lindås og Austrheim.