Kvikksølvfunn ved U-864

Flaska
vart funne liggjande laust i nærleiken av akterkjølen, og etter at flaska vart teken opp viste den seg å vera i god stand. - Det gjekk å skru korken av behaldaren, og kvikksølvet vart tømt over i annan emballasje, opplyser informasjonsrådgjevar Tine Randen i Kystverket. Med funnet av denne flaska er det endeleg bevist at U864 var lasta med kvikksølv, slik ein ut frå papir om planlagd last har rekna med. Sjølve lastedokumenta for denne ubåten forsvann då krigen tok slutt. Skipet Geo Bay, som med fjernstyrt undervassbåt har kartlagt vraket og leita etter kvikksølv, har no reist frå Fedje. - Geo Bay reiste frå staden måndag klokka 14.15.

Dårleg ver
Veret var no så dårleg med mykje vind, seier inforådgjevar Randen. Geo Bay kjem ikkje attende til Fedje for å gjera vidare undersøkingar, det arbeidet som er gjort no vil utgjera grunnlaget for rapporten som no skal lagast. I tillegg til å leita etter kvikksølvflasker skulle ein i denne omgang også kontrollera kor vidt skroget på det tyske ubåtvraket ville tola ei heving. Randen kunne måndag ikkje svara på om ein hadde fått kontrollert skroget. Det er verksemda Geoconsult som har oppdraget med å kartlegga vraket av U864, og dei har hatt med seg Franzefoss Gjenvinning AS for handsaming av kvikksølv. Kvikksølvet vart teke i land på CCB-basen på Ågotnes. Geo Bay har funne delar av det tidlegare sakna midtpartiet av ubåten, som vart sprengt i filler då U864 vart torpedert. Men kjølen til midtpartiet er ikkje funnen, og dersom det stemmer at ubåten hadde 65 tonn kvikksølv lasta i kjølen inneber det at inntil fem tonn kvikksølv kan vera sprengt vekk.