Kvinne funnen død i fjellet

Det var ein lokal mann som fann kvinna ved åttetida tysdag kveld på stien i Nordlandsdalen eit stykke oppom Andvik. På grunn av dårleg mobildekning tok det litt tid før han fekk varsla politiet, og kvinna vart henta ned med Luftambulansen, men ho har truleg vore død nokre timar då ho vart funnen.
? Ho har sikkert falle om på stien. Det er ikkje rett at ho har falle utfor ein skrent, slik det har stått i media, seier fungerande lensmann Bernhard Krokås i Masfjorden til Strilen.

Godt kjend
Kvinna, som heiter Helene Hodneland, men vart kalla Mosse,  budde på Hodneland i Lindås. Ho var i slutten av 70-åra, og var svært godt kjend i området der ho vart funnen. Ho hadde vore i fjellet nokre dagar, men hadde sagt frå til familien at ho tenkte seg heim att ein av dei første dagane.
Det er uvisst kor lenge ho har lege på stien, men det gjekk folk forbi der søndag, fortel Krokås.
Han seier alt tyder på at det var eit naturleg dødsfall, og det er ingen mistanke om noko kriminelt.