Kvinne pårygga og skadd i Knarvik

Haukeland Sjukehus opplyser onsdag morgon at det berre var snakk om lettare skadar. Kvinna låg då på nevrokirurgisk avdeling , opplyser Mona Høgli ved sjukehuset si info.avdeling. Den skadde kvinna er litt over 60 år.
Ulukka skjedde på E39 ved den tidlegare busslomma framfor Knarvik Senter.

Raskt på plass
? Me høyrde berre ein smell, seier Olav Sylta og Bente Kvinge i Gjensidige. Dei stod streikevakt utanfor kontoret i Knarvik. Ein person i andre høgda i bygget ropte at nokon måtte hjelpa kvinna. Dei to frå Gjensidige var dermed på pletten berre få sekund etterpå.
? Eg høyrde ein bil som rygga fort, og deretter kom smellen, seier ein næringsdrivande i eitt av nabobygga.
Kvinna hadde fått eit slag i bakhovudet i det ho skulle kryssa den trafikkerte E39. Bakruta vart knust då kvinna vart truffen.

? Bruk undergangen!
Folk frå Lindås og Meland lensmannskontor kom til og tok opp forklaring etter at den skadde kvinna hadde vorte køyrd vekk i ambulanse.
? Oppmodinga må sjølvsagt vera at fotgjengarar på denne sterkt trafikkerte staden må bruka undergangen like ved. Likevel er det klart at bilisten ikkje var aktsam nok, seier politibetjent Terje Hilland ved Lindås og Meland lensmannskontor. Bilføraren, ein mann mellom 35 og 40 år, har forklart til politiet at han stoppa og rygga etter å ha kjent att ein person som stod og haika.
? Føraren er også tatt til lege for sjekk av medikamentbruk. Uansett kva prøvane måtte visa, må mannen rekna med eit førelegg på fleire tusen kroner. Vegtrafikklova set svært strenge krav til å forvissa seg om at det er klar bane når ein ryggar, påpeikar Hilland.