Kvinnelege sjefar tener 41.500 mindre

? Då me rekna på dette, må eg berre vedgå at me vart overraska, seier Inger Helen Midtgård. Ho er lokalleiar i Fellesorganisasjonen (FO) i Lindås.

Fagforeninga omfattar barnevernpedagogar, sosionomar og vernepleiarar. No er medlemene der lei kommunen sin lønspolitikk.

«Liten vilje»

Den store skilnaden kom fram i ei undersøking i samband med dei lokale forhandlingane i fjor haust.

Den viser at kvinnelege avdelingssjefar i snitt tener 41.500 kroner mindre per år enn menn med same stillingsnemning. Den store skilnaden er tatt opp i eit brev til Likestillings- og diskrimineringsombodet i Oslo.

FO kan ikkje sjå at den store skilnaden står i forhold til talet på tilsette sjefane har under seg, talet på brukarar og andre objektive kriterier.

Rektorar inkludert

«Som fagforening har me teke dette opp i dei lokale lønsforhandlingane, men opplever liten vilje frå kommunen si side til å gå inn i dette», heiter det i brevet.

Håpet er at Likestillings-

ombodet vil sjå på saka og medverka til ein meir rettferdig lønspolitikk i Lindås.

Inger Helen Midtgård opplyser at 50 avdelingssjefar er med i undersøkinga, inkludert alle rektorane i kommunen. Av dei 50 er 22 menn og 28 kvinner.

? For rektorane har eg inntrykk av at storleiken i elevtal og tal tilsette på skulane spelar sterkt inn ved lønsplasseringa, seier Midtgård.

Ho opplyser elles at det kommunale likestillingsutvalet har fått kopi av brevet og står fritt til å ta opp saka.

Rådmann Henrik Flatøy, som snart går av med pensjon, meiner kommunen må sjå nærare på tala.

? Skilnaden verkar ganske stor, var Flatøy sin umiddelbare reaksjon i går.

Men rådmannen ville ikkje utan vidare gå god for tala Fellesorganisasjonen har lagt fram.

? Me bør rekna gjennom tala. Det vert også eit spørsmål kva avdelingssjefar som kan samanliknast. For rektorane spelar ikkje berre storleik på skule inn. Tidlegare lønsforhandlingar påverkar naturleg nok også korleis ein vert plassert, seier Flatøy.

? Tek tid

? Alt i dag dreg kommunen inn fleire moment under lønsforhandlingane, meiner Flatøy. Men han seier også at det tek tid å utjamna historiske skilnader i lønn mellom kvinner og menn.