Kyrkje-arbeidet ligg bak skjema

– Me hadde nok alle håpa på ein tidlegare byggjestart. Erfaringar frå andre stader viser likevel at å byggja kyrkjer er svært komplisert.

Det seier ordførar Astrid Aarhus Byrknes etter at formannskapet førre veke vart orientert om den siste framdriftsplanen.
Der kom det og fram at kommunen truleg må forskottera eit større beløp for å dekka ubetalte rekningar og vidare framdrift.

Ville starta i 2010
«Målet er å få til byggjestart helst i løpet av 2010», uttalte ordføraren til Strilen i mars 2009.

No står det «Byggjestart januar 2012» i siste oppdatering frå kyrkjeleg fellesråd, som står som byggherre med kommunal lånegaranti.

– Eg held meg no til at kommunestyret kan gjera det endelege vedtaket i desember, og at arbeidet kan starta opp i januar, seier Aarhus Byrknes.

– Fellesrådet får ei oppdatering om framdrifta frå prosjektleiinga i eit ekstramøte 6. september, opplyser leiaren i fellesrådet, Kåre Gaulen.
Han meiner dei berre er tre månader på etterskot etter sitt skjema.

– Er det for optimistisk å rekna med byggjestart i januar?
– Det er det vanskeleg for meg å uttale meg om no.

Trur ramma held
Med omsyn til kostnad har politikarane sett ei ramme på 75 millionar, inkludert kring fem millionar i grunnarbeid

I siste informasjon til formannskapet heiter det at «det er fullt mogleg å gjennomføra prosjektet innafor dei rammer som er lagt til grunn, herunder turvande andel til uforutsette/reserve-kostnader».

Anboda på kyrkja vil fellesrådet avklara i ein konkurranse mellom aktuelle utbyggjarar innan første veka i november. Dersom det held, vil formannskapet vita prislappen til sitt budsjettmøte på Voss 17. november.

– Frå politisk nivå har me vore tydeleg på at ramma på 75 millionar står fast. No får me berre venta og sjå kva anbod som kjem, seier ordføraren.

Når det gjeld gåver, er det innbetalt og gjeve tilsagn om kring 1,2 millionar kroner, blant anna til stolar.   Fellesrådet trur summen kan aukast vesentleg innan utgangen av 2011. «Det kan gje rom for kostnader som så langt ikkje er lagt inn i prosjektet,  til dømes orgel», heiter det i meldinga til formannskapet.

Store ubetalte rekningar
Formannskapet vart torsdag også orientert om at Fellesrådet no har 1,2 millionar i ubetalte krav frå arkitekt og konsulentar.

Fellesrådet har gått ut frå at lån skulle dekka planarbeidet, som inngår i totalkostnaden. Men lån kan ikkje takast opp før prosjektet er godkjent av Kyrkjedepertementet.

Prosjektansvarleg Åge Clausen strekar under at dette ikkje er meirforbruk, men forseinka opptak av lån.
I tillegg til det som er ubetalt, vil planlegginga ut året koma på 1,4 millionar. Dermed ser det ut til at kommunen inntil vidare må stilla opp med 2,6 millionar for at arbeidet ikkje skal stoppa opp.

– Me har bede rådmannen leggja fram ei ekstra sak om dette, opplyser ordføraren etter formannskapet sitt møte.