Laber interesse for å verta «kvalitetskommune»

? Olav Mongstad, som er tilsett i kommunen, var på årsmøtet og uttalte seg positivt om initiativet, seier leiaren i Utdanningsforbundet i Austrheim, Jan Nordø.
Så langt er 29 kommunar valde ut i første pulje i kvalitetskommune-programmet, som er eit samarbeid mellom staten, arbeidstakarorganisasjonane og KS.
Kommunane skal arbeida med utviklinga av kvalitet i møtet med innbyggjarar i oppvekstsektoren og innan pleie/omsorg. Redusert sjukefråvær er eitt av måla. Omstillinga skal vera ein del av den daglege drifta og ikkje eit skippertak, heiter det i uttalen frå Austrheim-lærarane.

Laber interesse
Prosjektet legg opp til eit nært samarbeid mellom leiing, organisasjonar og medarbeidarar. Kommunar som deltek, skal jobba i nettverk og få fagleg støtte.
Men frå kommunane i Nordhordland har interessa så langt vore laber. Kort fortald har ingen søkt om å få vera med, får Strilen opplyst i KS. Etter søknad innan 15. februar i år vart Fjell, Sveio og Vaksdal tatt med i prosjektet frå vårt fylke. Dessutan har Os, Askøy og Odda søkt. Neste søknadsfrist for å vera med går ut 1. september.
Målet er at halvparten av kommunane i heile landet skal delta i kvalitetskommune-arbeidet.

Tida inne
Utdanningsforbundet i Austrheim ser fleire grunnar til at deira kommune må vera med. Det vert vist til at etter år med kutt i fleire sektorar, er tida inne for ei sterkare satsing på kvalitet og kompetanse. Det vert og argumentert med «uheldige faglege implikasjonar» etter lokale forhandlingar.
No er det oppsamla underskotet snart betalt, skatteinntektene aukar og kommunen står framfor ei ytterlegare utbygging på Mongstad. For tida er innbyggjartalet på veg opp, og Utdanningsforbundet trur den utviklinga vil halda fram.
Lærarane ser for seg store utfordringar på personalsida og brukar det som eit viktig argument for å tilrå at Austrheim vert med i prosjektet med kvalitetskommunar.

? Vil vurdera nøye
? Det er lite eg har sett meg inn i dette, seier ein for tida ferierande ordførar Ole Lysø. Han henviser til rådmannen, som heller ikkje har sett seg inn i kva prosjektet går ut på.
? Det manglar ikkje på slike prosjekt som me kan gå inn på. Så dette må me vurdera nøye før me tek ei avgjerd, seier rådmann Jan Olav Osen. Han svarer «Å, ja?», når Strilen opplyser at første søknadsfrist var 15. februar i år.  Men Osen seier ein vil ha tid til å vurdera å søkja innan neste søknadsfrist.