Lær kinesisk i Knarvik

Til hausten startar skulen opp med undervisning i mandarin, det offisielle og mest brukte språket i Kina. Elevar kan då ta kinesisk som tredje framandspråk. Det vert undervisning fire timar i veka dei to første skuleåra.

Lokal effekt
? Det er mange lokale verksemder som samarbeider med Kina som kundar eller leverandørar. Det er viktig å kunna språket om ein skal olja dette samarbeidet. Det vil og vera ein fordel å forstå dei kulturelle skilnadane, seier Alver.
Tilbodet gjeld elevane som tek studiespesialiserande utdanning, tilsvarande tidlegare allmennfag. Desse kan ta kinesisk som tredje framandspråk. Men dersom ein skal læra å skriva kinesisk, krev det at ein lærer mange tusen teikn. Difor kjem elevane først og fremst til å læra kinesisk med vanlege, europeiske bokstavar.
? Dei kjem nok til å læra nokre kinesiske teikn og, men ein rekk ikkje gjennom alt på to år, seier rektoren.

Også spansk
Inge Alver trur språkopplæring i kinesisk kan vera til nytte for samfunnet og næringslivet i Nordhordland. Knarvik vidaregåande vil og starta opp med spansk.
? Også spansk er eit forretningsspråk som er i rask framgang, seier han.
Spansk vert nytta av nesten 270 millionar menneske, og er offisielt språk i nitten land. Tala vert likevel små om ein samanliknar med kinesisk: Av dei 1,3 milliardar innbyggjarane i Kina, snakkar kring ein milliard mandarin. Språket står sterkt i dei nordaustlege delane av Kina, og særleg i Beijing. Mange millionar menneske i andre land i Asia kan også snakka mandarin.

Ti prosent
Knarvik vidaregåande har frå før undervisning i engelsk som første framandspråk, og fordjuping i engelsk. Som andre framandspråk kan elevane velja mellom tysk og fransk. Her byggjer ein vidare på det språket ein lærte på ungdomsskulen.
Tredje framandspråk lærer ein heilt frå grunnen av på vidaregåande. Her har det i Knarvik berre vore tilbod om tysk, men no kan ein og velja kinesisk eller spansk.
? Me skal klara å få tak i lærekrefter, slik at tilbodet startar opp så sant mange nok elevar vil ha det, seier Inge Alver.
Han reknar med at minst tolv elevar bør velja kinesisk for at faget skal verta ein realitet i Knarvik. Skulen får frå hausten av fire førsteklassar, med meir enn 110 elevar til saman. Vel ti prosent av elevane kinesisk, kan ein høyra mandarin frå klasseromma frå hausten av.