Laga avisa «Just the Seim»

Arbeidet med avisa starta i oktober i fjor. I slutten av januar kunne opplaget på 90 delast ut til klassen og familiane til alle elevane på skulen.
? Det har vore veldig gøy, men mykje arbeid, fortel ein av redaktørane Johan Hopland Lofstad.
Han fortel at dei hadde idédugnad om kva som skulle stå i avisa. Deretter kunne elevane i klassen kryssa av for kva sak dei ønskte å arbeida med. Og avisa har vorte variert. Her det med litt aktuelt frå skuledagen, litt om Seim skule og det som skjer i Seim-bygda. Dei har og med underhaldning, vitsar, kryssord og teikneseriar. Og ei avis i dag kan jo ikkje mangla Su Doku, og difor har dei med det og.
Av dei meir dramatiske sakene i avisa er biletreportasje frå ein av flaumane i haust. Elevane har og funne ut at det har vore to stavkyrkjer på Seim, og har med ein reportasje om ei av desse.
? Me vil snart leggja stoffet i avisa ut på nettet, slik at også dei som ikkje har fått avisa kan sjå kva som står der, seier Lofstad.
Det vil då vera link til avisa på www.seim.skule.no.
Ein annan av dei fire medredaktørane, Sondre Ovrid, fortel at rolla som redaktør blant anna har gått på å bestemma kva sider dei ulike bileta og stoffet skulle vera på.