Låge tunnelar lagar lange omvegar

? Når me skal frakta gods mellom Dalsøyra og Eivindvik, må me køyra heilt rundt Duesund, Kringla og Brekke. Det vert ein omveg på eit par timar, fortel sjåfør Stian Johansen i Byrknes Auto AS til Strilen.
Grunnen er at Undalsunnelen mellom Dalsøyra og Leversund berre er 3,9 meter høg, medan bilane til Byrknes Auto er 4,08 meter.
Same problem har sjølvsagt andre som nyttar like høge bilar som Byrknes Auto.

Høvla ned
? Me har teke saka opp med Statens vegvesen, men ingenting er gjort, seier Johansen.
Han meiner det er såpass lite senking av tunnelen som skal til at ein kan klara det med å høvla ned asfalten. Det er lagt stadig nye lag med asfalt oppå kvarandre.
Byrknes Auto har overteke godstransporten over land til heile Gulen.
? Hadde det ikkje vore for denne tunnelen, kunne me hatt rute til Eivindvik tre dagar i veka, ikkje berre to som no, seier Johansen.
Han fortel at det har hendt at kundar har køyrt gjennom tunnelen til sørsida og henta godset hos dei der for å spara omvegen.

Større arbeid
? Det må truleg meir til enn å høvla ned asfalten, seier senioringeniør Gunnar Gjæringen i Statens vegvesen region Vest til Strilen.
Han fryktar at sjølve vegbana i tunnelen må senkast, og det kan verta eit ganske stort arbeid.
? Me kan ikkje leggja asfalten rett på fjellet. Dessutan må det vera drenering på begge sider av vegbana, forklarar han.
Tunnelen er 590 meter lang, så det er ein god del arbeid som skal til.

Inn på plan
? Eg er heilt samd i at det skaper problem at tunnelen er så låg, og noko burde vore gjort, men så langt ligg det ikkje pengar i nokon plan til dette, seier Gjæringen.
Han oppmodar både lokale firma og kommunen til å pressa på, slik at senking av tunnelen kjem inn i Nasjonal Transportplan (NTP).
? Riksvegtunnelar som er under fire meter høge, står på ei eiga liste for å fokusera særskilt på desse, fortel han.
Men inntil vidare må nok Byrknes Auto og andre med høge bilar, finna seg i å køyra omvegar.