Landås ny rådmann i Radøy

Det var eit samrøystes kommunestyre som gjorde tilsettinga på møtet i dag torsdag.

- Eg gler meg til å ta fatt på jobben, seier Landås, som meiner Radøy er ein interessant kommune å få vera med på utviklinga av.

- Organisasjonen ser ut til å vera full av pågangsmot og humør.

Landås er i dag tilsett som assisterande rådmann i Osterøy kommune, og har tre månaders oppseiingstid der. Det er ikkje klart i dag når han tek til i jobben på Radøy.

Fram til Landås tek til som ny rådmann etter Christian Fotland, som er rådmann i Lillehammer kommune frå 1. januar 2012, skal Leif Taule vera konstituert rådmann. Taule er i dag assisterande rådmann i Radøy.

Jarle Landås er tilsett i fast stilling , med ei årsløn på 820.000 kroner.

Det var i alt tolv søkarar til jobben i Radøy. Kommunen hadde hjelp av konsulentvefrksemda Kommunal Rekruttering til å finna fram til rett kandidat.

Dagens rådmann har vore tilsett på åremål. Ordførar Jon Askeland seier at Kommunal Rekruttering rådde til at ein no nytta fast tilsetting, og at det også er haldninga til Kommunenes Sentralforbund, KS.

- Trenden no er å gå vekk frå åremål til fast tilsetting, seier Askeland, og viser til at formannskapet var innstilt på å gjera om Christian Fotland si tilsetting frå åremål til fast jobb, i samband med at åremålet hans skulle ha vore oppe til ny forhandling i desse dagar. Slik vart det altså ikkje, etter som Fotland flyttar til Lillehammer.

Askeland viser til at kommunen vil ha ansvar for å tilby retrettstilling også for rådmenn som er tilsett på åremål, slik at det ikkje erså stor forskjell på fast tilsetting eller åremål.