«Landbruksareal» stoppar nye tomter

? Etter avtalen skulle eg ha fått betaling i 2003, seier Johan Martin Mangerøy (72). Tre år seinare viser han Strilen rundt i utmarka si på Urhaug på Manger, som fylkeslandbrukssjefen står fast på må vera landbruksareal.
Det dreiar seg om lyng og eine, knausar og rabbar som er definert som «utmarksteig».
? Dette kan vel ikkje vera til noko anna enn tomter? spør grunneigaren. Men fylkeslandbrukssjefen har sagt nei to gonger. Dette har kommunen definert som landbruksareal, så her kan det ikkje koma tomter, er tilbakemeldinga.

Denne saka har også vorte handsama i departementet, utan at kommunen har fått medhald der heller.
Sjølv la Mangerøy ned drifta av garden for seks år sidan då han vart pensjonist. Han har ingen som vil ta over.
? Slåttebøen heime har eg folk som haustar, men utmarka har ikkje vore i bruk på lenge, seier Mangerøy.
Det han peikar ut over, er litt myr og litt knausar, det meste overgrodd med eine og lyng.
? No tek det til å minka på ledige tomter i kommunen sitt felt. Og skråninga der borte bør no eigna seg godt for bustader, synest Mangerøy.
Avtalen han har inngått med kommunen, omfattar heile utmarka på 48 mål.
? Det er vel berre eit spørsmål om tid før kommunen kan oppfylla avtalen, trur jordbrukssjef og miljøvernleiar i Radøy kommune Asbjørn Toft.

Han forhandla i si tid fram avtalen med Mangerøy. Og Toft legg ikkje skjul på at han ikkje ser nokon som helst landbruksverdi i arealet. Det er absolutt ikkje til noko anna enn tomter, som kommunen treng fleire av på Manger.
Men problemet er at kommunen ikkje har fått endra kommuneplanen. Og i den har området status som landbruksareal. Og det er det Fylkeslandbruksstyret held seg til.
? No jobbar me med å revidera kommunedelplanen for Manger, seier Toft. Der skal utmarka omdefinerast til tomteland. Og så står det att å sjå om det resulterer i eit meir positivt svar frå høgare hald i Fylkeslandbruksstyret.