Lanserte senter på Hosteland

? Kommunen må undersøkja om Magnar Ulvatn har kontorplass for  til dømes PPT, barnevern og NAV-kontor, føreslo Arbeidarpartiet sin ordførarkandidat Liv Oda Dale i kommunestyret torsdag.
Ho så for seg at det på Hosteland kan byggjast opp ei fagmiljø både for Masfjorden og Gulen. Kanskje lensmannen og kunne flytta inn i same bygget?
? Det er viktig at me får til  noko robust som kan gje varige arbeidsplassar, sa Dale,
som tok saka opp i samband med at kommuenstyret skulle løyva 1,2 millionar kroner til prosjektet «Lokalsamfunnsutvikling i Masfjorden».

I andre sitt bed
Framlegget førde til ein lengre debatt i kommunestyret.
? Det er flott at me har tru på oss sjølve og ser Masfjorden som eit alternativ for senterutvikling, sa Ivar Holmaas (V).
Men samstundes kan eit slik framlegg verta oppfatta som å trakka i andre sine bed. For i Gulen pågår det ein debatt om det skal utviklast eit nytt senter der, til dømes i Eidsbotn. Og sentrale styresmakter har signalisert at samarbeid om NAV-kontor over fylkesgrensene er lite aktuelt.
Ein har også nett gått inn i eit PPT-samarbeid med kommunane i ytre Sogn og Sunnfjord, og det inneber ei desentralisert løysing, der PPT har folk i alle kommunane. I Masfjorden er denne stillinga no plassert på kommunehuset på Sandnes.

Delprosjekt
Etter kontakt mellom dei ulike partigruppene kom ein fram til eit foreslag som vart samrøystes vedteke. Der heiter det at kommunestyret ønskjer at det vert oppretta eit delprosjekt for lokalsamfunnsutvikling på Hosteland. Kommunestyret seier og at Hosteland bør vera ei godt alternativ for å utvikla felles privat og offentleg tenesteyting for Masfjorden og Gulen.
Kommunestyret vedtok og at det vert set ned ei arbeidsgruppe som skal starta arbeid  med ein reguleringsplan for Sandnes. I kommunestyret vart det opplyst at der er private aktørar som er interesserte i å leggja ut tomter viss der er tilgjengeleg areal.