Las i avisa at huset var seld

Strilen har kvar månad ei liste over omsette eigedomar i dei lokale kommunane. På lista over sal i juli, som var på trykk tidleg i august, heitte det at Gunnar Olav Skurtveit hadde selt huset sitt. Men dette hadde han slett ikkje gjort.
Skurtveit tok difor kontakt med Strilen for å påpeika feilen i lista.
? Eg har ikkje skrive under på noko, og heller ikkje sett noko til pengane, sa han litt humoristisk om feilen i eigedomslista.
Men sjølv om Skurtveit tok det fint var saka alvorleg nok. Når avisa tok kontakt med Statens kartverk fekk ein først berre stadfesta at jaudå, salet var tinglyst med den kjøpar og seljar som var oppført i lista.

Til Sunnhordland
Kjøparen som var oppført høyrde til i Sunnhordland, og etter ein telefon til familien byrja det å koma fram kva som hadde skjedd. Dei hadde rett nok kjøpt ein eigedom i juli, men det var tale om ei hytte i Sveio. Kommunen var altså feil, men kjøpesummen var korrekt.
Hjå Sveio kommune fekk avisa så stadfesta at hytteeigedommen i Sveio hadde akkurat same gards- og bruksnummer som Skurtveit sitt hus i Meland.

Kartverket tek skulda
Etter å ha undersøkt tinglysinga opp mot gjenpart av dokumenta kan Statens Kartverk stadfesta at feilen har skjedd hjå dei. Under innføring på data er det ført inn feil kommunenummer, og dermed har Skurtveit sitt namn dukka opp som seljar.
? Feilen skuldast ein punchefeil her hjå oss, og dette vert retta opp i dag, seier Magne Haglund, underdirektør i tinglysingsavdelinga i Statens Kartverk.
? Det skal ikkje skje slike feil, men det er menneske som tastar dette inn. Så då hender det at det skjer, seier Haglund, og viser til at avdelinga har hand om ein million tinglysingar årleg.
I dette tilfellet oppdaga huseigaren sjølv feilen. Om ikkje Skurtveit hadde sett at huset hans var «selt», ville feilen sannsynlegvis ikkje vorte oppdaga før mannen som er oppført som kjøpar fekk det tinglyste skjøtet tilsendt.

Kjøper
Lista over eigedomssal er data som Statens Kartverk sel til eit datafirma. Dette firmaet sel så listene vidare til norske aviser og andre media, med ei liste for kvar månad.