Leto-Elin månadens etablerar

Månadens etablerar:

• Region Nordhordland – Nordhordland Utviklingsselskap IKS starta i mars med å kåra månadens etablerar.

• Kåringa er eit samarbeid med Etablerarsenteret i Region Bergen som presenterer månadens verksemd.

• Kåringa skal synleggjera etablerarane i regionen og få ut dei gode historiene om dei.

• Tidlegare tittelerte:

Mars: Elisabeth Tonheim frå Lindås med verksemda Heilt originalt.

April: Kai-Robin Kleppe frå Osterøy med verksemda L7.no.

--------------------------------

Å bruka sveinebrevet sitt som kjole- og draktsyerske til å starta for seg sjølv, er ein draum Elin Gaulen har hatt i over 20 år.

No tryllar ho fram den eine kjolen lekrare og morsommare enn den andre, både til liten og stor.

Elin og sambuaren Ole overtok Gaulen gard på Hundvin for to år sidan.

Løa er blitt systove og butikk, men golv og veggar var så vidt på plass før symaskina flytta inn.

– Eg elskar å vera kreativ, og eg elskar å jobba med hendene, seier ho.

Alt for kunden

Elin har også gått eit år på klede, mote og design.

Ho stortrivst som klededesignar og har etter kvart eit ganske stort utval av kreasjonar i ulike fargar og storleikar.

I tillegg kan kundane bestilla kva dei vil.

Vil dei ha noko litt ut her, litt inn der, litt kortare her og litt lenger der, så er ikkje det noko problem heller.

– Det er kundane som bestemmer.

Dei skal helst vera meir enn fornøgde når dei går ut frå Letobutikken.

Plagget skal passa og vera slik dei sjølv ønskjer både i fasong, størrelse og fargar, seier ho.

I butikken har ho også eit utval av andre tekstilar og gåver for dei som ikkje ønskjer kjolar. Utleie av stoltrekk til bryllaup er eit eksempel på det, fortel ho.

Fekk drahjelp

Leto betyr strålande, det tyder namnet Elin også.

Men ho har ikkje alltid vore like strålande som ho er no. I alle fall ikkje den tida ho var i Nav-systemet.

Der fekk ho omskolering innan multimedia, noko som var ganske fånyttes då det ikkje fanst jobbar.

Men då ho fekk ein sakshandsamar som trudde på draumane hennar, endra alt seg. Sidan har Elin stråla som ei sol.

– Eg fekk det avgjerande sparket bak, våren 2010.

Då gjekk eg på etablerarverkstaden i Næringshagen på Mongstad.

Der fekk eg hjelp til å utvikla ideen til eiga verksemd, seier ho.

Nesten alltid ope

Sidan løa er både arbeidslokale og butikk, er butikken hennar så og seia alltid open.

Og for at ingen skal vera i tvil kor det er, har sambuaren laga eit sabba skilt ved Fylkesveg 57.

– Løa ligg berre eit par hundre meter frå hovudvegen, så det er berre å svinga bortom, seier ho.

Elin likar også å ha demonstrasjonar både i butikken og heime hjå folk.

I tillegg sel ho kjolane sine gjennom ein butikk på Austlandet.

­– Eg jobbar stadig med å få til samarbeid med fleire forhandlarar, men det går seg til, smiler den blide sydama.

Elin er sjølvsagt også frampå på internett og har si eiga heimeside med nettbutikk: www.leto.no