Lindåasingar får billegare vatn

? Me har nok sløst litt med vatnet tidlegare, vedgjekk Ivar Hopland frå Statoil Mongstad då ein ny avtale med kommunen vart underskriven.
Med frå Statoil var også Svein Gunnar Nesse, samt rådmann Henrik Flatøy, kommunalsjef Kåre Jordal og avdelingsleiar John Bauge frå kommunen.
Avtalen frå 1985 har til no gjeve raffineriet på Mongstad vatn til rundt kroner 3,20 per kubikkmeter. Frå nyttår må ein av Lindås sine største kundar den same prisen som oss andre: Kr 8,66 per kubikkmeter.
For Statoil Mongstad inneber prisauken kring tre millionar kroner på årsbasis. Rådmannen sin signatur av avtalen kom på plass ved ein enkel seremoni på rådhuset torsdag.

Ti prosent billegare
For vanlege forbrukarar i Lindås gjekk vassavgifta ned med ti prosent frå 1. januar - til kr 2.165 per år. Frå 1. januar 2006 går avgifta ytterlegare ned 10 prosent, som eit direkte resultat av at Statoil må betala meir.
Lovverket seier nemleg at kommunale vassverk skal drivast på «non-profit»-baisis. Kom-munane må leggja fram rekneskap som viser at avgiftene dekkjer akkurat reelle utgifter.
? Om nokon måtte meina at Statoil har vorte subsidiert, så er i alle høve det historie no, seier Ivar Hopland. Han gjorde det klart at dei som styrer dei største vasskranane på Mongstad, vil få klare instruksar om å vera meir sparsamelege. Til no har billeg drikkevatn nok ført til litt sløsing der industrivatn kunne vore nytta.
? Det vert litt enkelt å hevda at innbyggjarane har subsidiert Statoil. Då avtalen vart inngått i 1985, hadde Statoil eigne anlegg som kommunen kunne overta, seier John Bauge. Han har følgd og planlagt Lindås si vassverkutbygging gjennom 20 år. Men han legg ikkje skjul på at Statoil, med skarpskodde juristar frå Oslo, forhandla seg fram til ein gunstig avtale for 20 år sidan.

Greie forhandlingar
? Me har sett at den nye og dyrare avtalen måtte koma. Forhandlingane med kommunen har vore greie, seier Ivar Hopland.
Både han og kommunen sine folk legg vekt på at samarbeidet går knirkefritt. Ein periode med knapt med vatn på 1980-talet var tonen frå tid til anna litt anstrengt.

Vatn til gasskraftverk
Ivar Hopland viser til at prisen Statoil no må ut med, ligg om lag i same gata som selskapet betalar andre stader.
? Me måtte forventa å betala den prisen som kommunen kan ta etter lovverket, seier Hopland. Både han og avdelingssjef Bauge opplyser at det er vurdert løysingar som vil gje nok vatn også om det vert bygd gasskraftverk på Mongstad.
? Elles får Lindås no att for å vera tidleg ute med større investeringar innan vassverk. Me kan setja avgifta ned, medan andre kommunar er på veg oppover med sine avgifter, seier John Bauge.
Ved sida av Statoil, er Austrheim kommune og Norsk Hydro Lindås sine største vasskundar. Basen på Mongstad Sør forsyner i dag 15 plattformer i Nordsjøen. Mange av kundane som treng vatn offshore, føretrekkjer vatn levert via Mongstad på grunn av god kvalitet på vatnet.