Lindås og Modalen klar for nye bompengar

Det kommunestyra i dei to kommunane sa ja til er ei vegpakke som mellom anna inneber ny riksvegtrase over Radøy, vegutbetringar og rundkjøringar i Isdalstø/Knarvik, vegutbetringar i Meland og pengar til trafikksikring ulike stader i fase 1. I fase 2 er Nyborgtunnelen det største enkeltprosjektet. Forslaget inneber èin bom, som skal stå ved Nordhordlandsbrua.
Dei 14 som røysta mot forslaget var dei sju frå FrP, begge frå SV, Audun Stusdal, Nils-Arne Træland og May- Eva Sandvik frå Høgre og Magne Frammarsvik frå Ap. Når alle kommunestyra i regionen har handsama saka, går ho vidare til fylkestinget. Vert det ja også der går søknaden vidare til handsaming i Stortinget. Så langt er det Meland, Modalen og Lindås som har hatt oppe saka. Forslaget til fleirtalet i representantskapet i regionrådet vart altså vedteke i Lindås i ettermiddag,  medan det vart nei i Meland onsdag.
Fleirtalet i Lindås støttar søknad om løyve til bompengefinansiering av Nordhordlandspakken fase 1, med følgjande tilføyingar og presiseringar:
? Det skal arbeidast for at Nyborgtunnelen blir realisert snarast.
? Utbetringa som skissert for riksveg 570 i Masfjorden kommune skal vera inkludert i fase 2.
? Bom 2 på grensa Lindås/Radøy vert teken ut av planen.
? Prinsippet for finansiering av planen bør vera at staten skal bidra med minimum 50 prosent.

Steile frontar
Som vanleg var frontane for og mot nye bompengar steile. Som venta framstod Magne Frammarsvik som einaste mot frå Ap. Han viste til programformuleringa at «Ap vil at bompengar på Nordhordlandsbrua ikkje vert vidareført når brua er betalt» i programmet ved valet i 2003. Å gå for pakken vart for han eit brot med programmet.
? Den urettferdige innkrevinga gjer at eg går mot. Pakken råkar heilt tilfeldig mot dei som har jobben sin sørom fjorden. Dei andre som køyrer på arbeid internt i Nordhordland, slepp unna, sa Frammarsvik. Han skulda resten av gruppa si og andre som var for, for å vera landevegsrøvarar, umoralske og maktovergriparar.

Løyser tidlegare
? Å seia ja er å løysa vegtiltak langt tidlegare. Å seia ja er å følgja næringslivet sine ønskje. Ein bompengepakke er heilt nødvendig i høve til milliardinvesteringar på Mongstad og i Knarvik, argumenterte Sveinung Valle på vegner av fleirtalet i Ap-gruppa. Han møtte som vara for Eldbjørg Valle. Sveinung Valle viste til at mange vegpakker er på gang i Hordaland, slik at kampen om statlege vegmidlar vert hardare og hardare. Han viste også til at nye bompengar først er aktuelt frå 2010, og Ap sitt nye program for denne perioden er positivt til bompengar.

Varsellampar
? Me drøfta fleire vegpakker i fylkestinget. No drøftar me Nordhordlandspakken, og nyleg vart ein pakke for ferjefritt samband Bergen-Stord lansert. Bør det ikkje ringja varsellampar i kloke lokalpolitiske hovud? spurde Bjørn Arne Aakvaag, talsmann for Frp sin motstand.
Han sa at partiet ikkje er med på argumentasjonen om at «andre fer med vegpengane» om ikkje Nordhordland viser vilje til å ta ein del av rekninga sjølv.
Blant fleirtalet som sa at dei «ikkje trur på julenissen» og «held seg til politiske realitetar», var Svein Børtveit (Krf) og Sveinung Toft (V).
? Venstre gjekk til val på nye bompengar avdi me vil ha nye vegar i regionen, kunngjorde Sveinung Toft med stort engasjement og høgt volum. Han spurde kva det er alle andre regionar i fylket har forstått.
? Det er harde pakker, harde realitetar som må til for å få gjort noko, sa Toft.
Etter møtet sa Toft til Strilen at folk på Osterøy var strålande nøgde etter at  Lindås i førre runde sa nei til meir bompengar.
? Det gav meir pengar til vegar der, så Osterøy håpar nok at Nordhordland seier nei ein gong til, så får dei endå meir vegutbygging, sa Toft.

Skuffa motstandarar
? Eg røysta Ap ved førre val nettopp på grunn av formuleringa mot vidareføring av bompengar. Difor er eg skuffa over fleirtalet i gruppa si haldning. Eg støttar Magne Frammarsvik sitt nei, kommenterte Tove Baldysz frå Knarvik, som følgde debatten saman med ektemannen Jan. Tove Baldysz gjorde det klart at ho neppe kjem til å gje stemma si til Ap ved komande lokalval. Også ektemannen Jan var skuffa over utfallet.
Like fortørna var utsendingane frå aksjonen «Nei til meir bompengar i Nordhordland», Morten Clementsen og Gudmund Husdal.
? Eg hadde håpa at eit fleirtal skulle ta til fornuft og seia nei. Eg er rett og slett skremt, sa Clementsen. Men han sa også at han trur høgare styresmakter kan få vanskar med å påtvinga ein bom i Meland, ein kommune som seier klart nei. Dessutan trur han overvakingsorganet ESA ikkje går med på ein slik pakke avdi det manglar nærleik til hovudprosjektet på Radøy.

1 mot i Modalen
I Modalen kommunestyre var Britt Farestveit den einaste av 13 representantar som røysta mot.