Lindås på svarteliste

PBL har undersøkt i 70 kommunar og meiner at 28 av desse bryt forskrifta. Blant dei sistnemnde er altså Lindås kommune. Ove Sæbø, eigar og styrar i den private Leiknes barnehage, er likevel nøgd med samarbeidet med Lindås kommune.

? Eg opplever samarbeidet som veldig bra. I ei tid med store reformer innan skule og barnehage er det inga lett sak for ein liten administrasjon å halda seg oppdatert på alt. Men slik det er i dag, klagar eg ikkje, seier Sæbø.

Bryt forskrift

Kriteria for å koma på denne svartelista er at kommunen bryt eitt eller fleire av følgjande punkt: At kommunen ikkje enno har gjort vedtak for utmåling av tilskot til drift i 2005. At dei ikkje har gjort berekningar med omsyn til forskriftsendringar 1. august 2005. At dei ikkje har dokumentert berekninga slik forskrifta krev, eller at dei brukar utrekningsmodellen frå departementet feil.

? Dette gjev for mange økonomisk uforutsigbarheit og set press på kvaliteten i barnehagane. I tillegg skapar det usikkerheit i høve full barnehageutbygging. Foreldre tapar på dette i høve til ressursar som kunne vore brukt til kvalitet, og ikkje minst foreldre i kø må kanskje venta lenger på barnehageplass som følgje av at færre tør starta nye barnehagar eller byggja ut barnehagen med fleire plassar for å få ned køen, skriv dagleg leiar i PBL, Arild M. Olsen, i ei melding.

Lindås usamde

Det som PBL meiner ikkje er i orden i Lindås kommune, er at kommunen ikkje har dokumentert berekningsgrunnlag for eigne kostnader.

I praksis betyr det at kommunen ikkje har rekna ut kva kostnader dei har med drift i dei kommunale barnehagane.

Regelen er at dei private skal få minst 85 prosent tilskot av det det kostar å driva dei offentlege barnehagane.

Når kommunen ikkje veit kva kostnaden er med dei offentlege barnehagane, vert tilskotet til dei private tilfeldig, meiner informasjonssjef Jørn-Tommy Schelderup i PBL.

Barnehagekonsulent Astrid Namtvedt Sylta er usamd med PBL i at Lindås ikkje har dokumentert eigne kostnader i barnehagedrifta.

? Reknearket som Staten bed oss om å bruka er komplisert. Men me meiner at PBL har fått det grunnlagsmaterialet dei treng for å finna ut av dette. I tillegg går dette fram av dei kommunale rekneskapa, som er offentlege for alle, seier Sylta.