Lindåstunet kan verta årets eldsjel

? Det er ei skikkeleg fjør i hatten for oss å verta nominert til å verta årets eldsjel, seier fungerande leiar Ove Jan Paulsen ved Lindåstunet til Strilen.
Det er Bergens Tidende, Kvalifondet, Sparebanken Vest og G. C. Rieber som står bak utmerkinga, som er eit kunstverk av kunstnaren Lotte Konow Lund.
Prisen vert delt ut på eit eige show på Ole Bull Scene i Bergen 25. mars.

Kan stemma
I klassen for humanitært arbeid er det fire nominerte, og folk som vil stemma på Lindåstunet, kan senda inn si stemme på e-postadressa www.bt.no/ildsjel fram til og med 18. mars. Same person kan berre avgje stemme ein gong kvart døger.
? No må folk stemma slik at Lindåstunet når opp i konkurransen, seier ei eldsjel som kjem innom avisa.

Dugnad
Det aller meste av arbeidet som vert utført på Lindåstunet, vert utført på dugnad.
? Me har om lag 40 frivillige som gjer ein innsats, seier Paulsen.
Berre nattevaktene og nokre til får betaling for arbeidet dei gjer.
For tida har Lindåstunet nesten fullt belegg. Berre eitt rom er ledig.
? Det hadde vore veldig kjekt å få denne utmerkinga, seier Paulsen.
Årets eldsjel skal gå til enkeltpersonar eller lag og organisasjonar som brenn for noko, eller som gjer ein frivillig og ueigennyttig innsats for samfunnet.